އަންހެނުންގެ ވޯލްޑް ކަޕް ފަށާނީ މިއަންނަ މަހުއެވެ. މުބާރާތް ކުރިއަށްދާނީ އޮސްޓްރޭލިއާ އަދި ނިއުޒިލެންޑުގައެވެ.
މިއީ މާޓެންސް ނެދަލެންޑްސް ޖާޒީގައި ވޯލްޑް ކަޕާއި ކުރިމަތިލާ ތިންވަނަ ފަހަރެވެ. މީގެ ކުރިން 2019 ވަނަ އަހަރު މުބާރާތުގެ ރަނައަޕްކަން ހޯދިއިރުވެސް މާޓެންސް ވަނީ ނެދަލެންޑްސް ޓީމަށް މުހިންމު ދައުރެއް އަދާކޮށްދީފައެވެ. އެފަހަރު އެމެރިކާ އަތުން ފައިނަލުގައި ނެދަލެންޑްސް ބަލިވީ ޕެނަލްޓީ ޖަހައިގެންނެވެ.
އޭނާ ބުނީ މިފަހަރުގެ އަމާޒަކީ ވޯލްޑް ކަޕްގެ ތަށި އުފުލާލުމަށް ދެކެމުން އަންނަ ހުވަފެން ހަގީގަތަކަށް ހެދުން ކަމަށެވެ. މީގެ އިތުރުން، ވޯލްޑް ކަޕްގެ ތަށި ކާމިޔާބު ކުރެވިއްޖެ ނަމަ އޭނާގެ ކެރިއަރުގައި އަމާޒުހިފި ހުރިހާ ކަމެއް ހާސިލްވީ ކަމަށްވެސް ފީފާއަށް ދިން އިންޓަވިއުގައި މާޓެންސް ބުންޏެވެ. އެހެންކަމުން މިފަހަރުގެ މުބާރާތް ކާމިޔާބު ކުރަން ކުރެވެން ހުރި ހުރިހާ ކަމެއް ކުރާނެ ކަމަށްވެސް އުމުރުން 30 އަހަރުގެ މާޓެންސް ބުންޏެވެ.
މާޓެންސް ވަނީ ބާސެލޯނާއަށް ކުޅުނުއިރު ތިން ލީގު ތަށްޓާއި، ޗެމްޕިއަންސް ލީގު ތަށި ކާމިޔާބުކޮށްދީފައެވެ. މީގެ އިތުރުން، 2017 ވަނަ އަހަރު އޮތް ޔޫރަޕިއަން ޗެމްޕިއަންޝިޕް ނެދަލެންޑްސްއަށް ހޯދައިދިނުމުގައިވެސް އޭނާގެ ދައުރު ބޮޑެވެ. މާޓެންސް މިހާރު ކުޅެމުން އަންނަނީ ފްރާންސްގެ ޕީއެސްޖީއަށެވެ.
