އެ ކަމަށްޓަކައި އެމްއޭސީއެލްގައި ބޭއްވި ހާއްސަ ރަސްމިއްޔާތެއްގައި އެ ކުންފުނީގެ ފަރާތުން މި އެހީ ހަވާލުކޮށްދެއްވީ މެނޭޖިން ޑިރެކްޓަރު އަދި ސީއީއޯ މަހުޖޫބް ސުޖާއުއެވެ. ސީއެސްއެމްގެ ފަރާތުން އެހީ އާ ހަވާލުވެލެއްވީ އެ ޖަމިއްޔާގެ ހަޒާންދާރު ނީނާ މަންސޫރެވެ.

އެމްއޭސީއެލުން ބުނީ ސީއެސްއެމްއަށް ދިން އެއް ލައްކަ ރުފިޔާގެ އެހީ ހޭދަކުރުމަށް ހަމަޖެހިފައިވަނީ ކެންސަ ސްކްރީނިން އެޕްލިކޭޝަނެއް ހެދުމަށާއި ޑޭޓާބޭސްއެއް ތަރައްގީ ކުރުމަށް ކަމަށެވެ.

މި އެހީއަކީ އެ ކުންފުނީގެ އިޖުތިމާއީ ޒިންމާގެ ދަށުން ދެވުނު އެހީއެއް ކަމަށާއި މުޖުތަމައުގެ ދުޅަހެޔޮ ކަމަށާއި ރާއްޖޭގެ ސިއްހީ ދާއިރާގެ ކުރިއެރުމަށް އަބަދުވެސް އެހީތެރިކަން ދޭނެ ކަމަށް އެމްއޭސީއެލުން ބުނެއެވެ.

އެމްއޭސީއެލުން ބުނެފައިވަނީ ކެންސަ ސްކްރީނިން އެޕްލިކޭޝަނެއް ހެދުމަށް ދެވުނު އެހީގެ ސަބަބުން ސީއެސްއެމުން ކެންސަރާ މެދު އާންމުން ހޭލުންތެރިކުރަން ކުރަމުން އަންނަ މަސައްކަތްތަކަށް އިތުރު ކުރިއެރުންތައް ލިބިގެންދާނެ ކަމަށެވެ. އެޕްލިކޭޝަން ހެދުމުން ސްކްރީންކުރުމުގެ އެންމެހާ ކަންކަން ހަރުދަނާވެ، ރެކޯޑުތައް ބެލެހެއްޓުމަށް ފަސޭހަތަކެއް ލިބިގެންދާނެ ކަމަށް އެމްއޭސީއެލުން ބުނެއެވެ.

ސީއެސްއެމުން ބުނި ގޮތުގައި މިހާތަނަށް 20،900 މީހަކު ކެންސަރަށް ސްކޭންކޮށްފައިވާ ކަމަށެވެ. އޭގެ ތެރޭގައި އުރަމަތީ ކެންސަރު، އަނގައިގެ ކެންސަރުގެ އިތުރުން ސާވިކަލް ކެންސަރު ހިމެނޭ ކަމަށް އެ ސޮސައިޓީން ބުނެއެވެ.

ސީއެސްއެމުން ބުނެފައިވަނީ މި އަހަރުގެ ތެރޭގައި ޕްރޮސްޓޭޓް އަދި ކޮލޮރެކްޓަލް ކެންސަ ސްކްރީނިން ތައާރަފުކުރުމަށް މަސައްކަތް ކުރަމުން އަންނަ ކަމަށެވެ. ޕްރޮސްޓޭޓަކީ ފިރިހެނުންގެ ތެރޭގައި އާންމު ކެންސަރުގެ ބާވަތަކަށްވާއިރު ކޮލޮރެކްޓަލް ކެންސަރަކީ ހަޖަމުގެ ނިޒާމަށް ޖެހޭ ކެންސަރެކެވެ.