މުލި-ނާލާފުށި ކޯޒްވޭއަކީ ރައީސް ސޯލިހުގެ ވައުދެކެވެ. އެ ވައުދު ފުއްދުމަށް 2022 ވަނަ އަހަރަށް ލަފާކުރި ބަޖެޓުގައި އެ މަޝްރޫއުގެ މަސައްކަތް ހިމެނިއެވެ. އެހެންނަމަވެސް ބަޖެޓު ފާސްކުރިއިރު އެ މަޝްރޫއު ހިމެނިފައެއް ނުވެއެވެ. މި އަހަރަށް ލަފާކޮށް ފާސްކުރި ބަޖެޓުގައި އެ މަސައްކަތަށް 910،000 ރުފިޔާ ހިމަނާފައި ވީނަމަވެސް އެ މަޝްރޫއުގެ މަސައްކަތް ކުރުމަށް އެއްވެސް ފަރާތަކާ ހަވާލުކުރި ކަމަށް މިހާތަނަށް އެނގޭކަށް ނެތެވެ.
ރައީސް މިއަދު ވިދާޅުވެފައިވަނީ މުލި އެއާޕޯޓުގެ މަސައްކަތް މި އަހަރު ނިމުމާ އެކު، މުލި-ނާލާފުށި ކޯޒްވޭގެ މަސައްކަތް އަންނަ އަހަރު ފަށާނެ ކަމަށެވެ.
ކޯޒްވޭ އެޅުމާ އެކު ދެ ރަށަށް ވެސް ފަސޭހަވާނެކަން ފާހަގަކުރައްވާ ރައީސް ވިދާޅުވީ ނާލާފުށިން ލިބެން ނެތް ހިދުމަތްތައް ހޯދުމަށް ފަސޭހަކަމާ އެކު އެއްގަމު މަގުން ދަތުރުކޮށް ހިދުމަތް ހޯދޭނެ ކަމަށެވެ.
ނާލާފުއްޓަކީ އާބާދީގެ ގޮތުން ކުޑަ ރަށެއް ނަމަވެސް އެ ރަށަށް ކޮށްދޭން ޖެހޭ ކަންކަން ކޮށްދެއްވުމުގައި ތަފާތު ނުކުރައްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި އެ ރަށުން މިދިޔަ ރިޔާސީ އިންތިހާބުގައި ލިބިވަޑައިގަތީ 38 އިންސައްތަ ވޯޓު ކަމުގައެވެ. އެހެން ނަމަވެސް ރަށަށް ހިދުމަތްތައް ފޯރުކޮށްދެއްވާ ތަރައްގީ ގެނެސްދެއްވީ އެކަމަށް ބެއްލެވުމެއްނެތި ކަމަށް ރައީސް ވިދާޅުވިއެވެ. ރައީސް ވިދާޅުވެފައިވަނީ ކުރިއަށް އޮތް އިންތިހާބުގައި އެ ނަތީޖާ ބޮޑުތަނުން ބަދަލުވެގެންދާނެ ކަމަށް ގަބޫލުކުރައްވާ ކަމަށެވެ.
ރައީސް ސޯލިހު ވަނީ ދެވަނަ ދައުރެއްގައި ނާލާފުށި ބަނދަރު ތަރައްގީ ކުރައްވާނެ ކަމަށް ވައުދުވެވަޑައިގެންފައެވެ.
