މިއީ ވޯލްޑް ކަޕް މުބާރާތަށް ފިލިޕީންސްގެ އަންހެން ޓީމު ކޮލިފައިވި ފުރަތަމަ ފަހަރެވެ. އަދި ވޯލްޑް ކަޕްގައި އެޓީމުން ހޯދި ފުރަތަމަ މޮޅެވެ.
މުބާރާތުގައި އެގައުމުގެ ފުރަތަމަ ލަނޑު، އަދި މެޗުން މޮޅުވި ލަނޑު ޖަހައިދިނީ ސެރީނާ ބޯލްޑެންއެވެ. މިއީ މަތިމަތިން އައި ބޯޅައެއް ބޮލުން ޖަހާ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.
މި މެޗަށް ނުކުތް އިރު، މެޗު ކާމިޔާބު ކުރާނެ ކަމަށް ގިނަ ބަޔަކު ގަބޫލުކުރީ ނިއުޒިލެންޑެވެ. ނިއުޒިލެންޑުން ވަނީ ވޯލްޑް ކަޕްގައި އެޓީމުގެ ފުރަތަމަ މޮޅު ހޯދާފައެވެ. އެހެންކަމުން، ފިލިޕީންސް ބަލިކޮށްގެން، އެންމެ ފުރަތަމަ މުބާރާތުގެ ގަދަ 16 އަށް ދަތުރުކުރުމުގެ ފުރުސަތު އެޓީމަށް އޮތެވެ.
މި ގްރޫޕްގައި ދެން ވާދަކުރަނީ ސްވިޒަލެންޑާއި ނޯވޭއެވެ. މި ދެޓީމު ބައްދަލުކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.
