އެސްޓީއޯއިން މިއަދު ވަނީ މި އަހަރުގެ ދެވަނަ ކުއާޓަރުގެ ހިސާބުތައް އެ ކުންފުނީގެ ވެބްސައިޓުގައި އާންމުކޮށްފައެވެ. އެސްޓީއޯއިން ބުނެފައިވަނީ ދުނިޔޭގެ ބާޒާރުގައި ތެލުގެ އަގަށް އައި ބަދަލާ ގުޅިގެން އެ ކުންފުނިން ވިއްކަމުން ދިޔަ ތެލުގެ އަގު ދަށްކުރުމާ އެކު، ތެލުގެ ވިޔަފާރިން ލިބުނު އާމްދަނީ ދަށްވެފައިވާ ކަމަށެވެ. އެގޮތުން މި ކުއާޓަރުގައި ލިބުނު އާމްދަނީ ކުރީ ކުއާޓަރާ އަޅާބަލާއިރު 15 އިންސައްތަ ދަށްވެފައިވާ ކަމަށް އެސްޓީއޯއިން ބުނެއެވެ.
އެސްޓީއޯއިން ބުނި ގޮތުގައި ޖުމްލަ ފައިދާގެ ގޮތުގައި އެ ކުންފުންޏަށް މި ކުއާޓަރުގައި 804 މިލިއަން ރުފިޔާ ލިބިފައިވާ ކަމުގައެވެ. މިއީ އަހަރުގެ ފުރަތަމަ ކުއާޓަރާ އަޅާބަލާއިރު އެއް އިންސައްތައިގެ ދަށްވުމެކެވެ.
ދެވަނަ ކުއާޓަރުގައި ހިންގުމުގެ ފައިދާގެ ގޮތުގައި 428 މިލިއަން ރުފިޔާ ލިބިފައިވާއިރު، މިއީ މިދިޔަ ކުއާޓަރާ އަޅާބަލާއިރު 15 އިންސައްތައިގެ ދަށްވުމެއް ކަމަށް އެ ކުންފުނިން ބުނެއެވެ.
އެސްޓީއޯއިން ބުނީ ޓެކްސްއަށް ކެނޑުމުގެ ކުރިން މި ކުއާޓަރުގެ ސާފު ފައިދާއަކީ 373 މިލިއަން ރުފިޔާ ކަމަށާއި ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި ލިބިފައިވަނީ 303 މިލިއަން ރުފިޔާ ކަމަށެވެ. މިއީ ކުރީ ކުއާޓަރާ އަޅާބަލާއިރު 18 އިންސައްތައިގެ ދަށްވުމެއް ކަމަށް އެ ކުންފުނިން ބުނެއެވެ.
އަހަރުގެ ފުރަތަމަ ކުއާޓަރާ އަޅާބަލާއިރު ދެވަނަ ކުއާޓަރުގައި ފައިދާ ދަށްވި ނަމަވެސް، ޖޫން މަހުގެ ނިޔަލަށް ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި 671 މިލިއަން ރުފިޔާ ލިބިފައިކަމަށް އެސްޓީއޯއިން ބުނެއެވެ. އެސްޓީއޯއިން ބުނެފައިވަނީ އެއީ މިދިޔަ އަހަރުގެ ފުރަތަމަ ހަ މަސް ދުވަހާ އަޅާބަލާއިރު 366 މިލިއަން ރުފިޔާގެ ކުރިއެރުމެއް ކަމަށެވެ.
އެސްޓީއޯއިން ވަނީ އެ ކުންފުނީގެ ވިޔަފާރީގެ އެންމެހާ ބައިވެރިން ކުންފުނީގެ ކަންކަމާ މެދު ބަހައްޓާ ގާތްކަމާއި ދޭ އެހީތެރިކަމާއި އެއްބާރުލުމަށް ޝުކުރު އަދާކޮށްފައެވެ.
