ބީއެމްއެލުން މިއަދު އާންމުކުރި ދެވަނަ ކުއާޓަރުގެ ތަފާސް ހިސާބުތައް ދައްކާގޮތުން ޓެކްސްއަށް ކެނޑުމަށްފަހު ފައިދާގެ ގޮތުގައި އެ ބޭންކަށް 552 މިލިއަން ރުފިޔާ ވަނީ ލިބިފައެވެ. ބީއެމްއެލުން ބުނީ އެ އަދަދު ލިބިފައިވަނީ ވިޔަފާރީގެ މައިގަނޑު ހުރިހާ ދާއިރާއަކުން ލިބުނު ކުރިއެރުމާ އެކު (ދޫކުރެވުނު ލޯނުގެ އަދަދު އިތުުރުވުމާ އެކު) ކަމަށެވެ. މިއީ އެއް އަހަރުން އަނެއް އަހަރާ އަޅާބަލާއިރު 55 އިންސައްތަ އިތުރު އަދަދެއް ކަމަށް އެ ބޭންކުން ބުނެއެވެ. ބީއެމްއެލުން ބުނެފައިވަނީ އެ ބޭންކުގެ ރައުސްމާލާއި ލިކިއުޑިޓީ ރޭޝިއޯ ވަނީ ގާނޫނުން ލާޒިމުކުރާ މިންވަރަށްވުރެ މަތީގައި ހިފެހެއްޓިފައި ކަމަށެވެ.
ދެވަނަ ކުއާޓަރުގައި ހިންގުމުގެ ފައިދާގެ ގޮތުގައި ބީއެމްއެލަށް 678 މިލިއަން ރުފިޔާ ލިބިފައިވެއެވެ. އެއީ މިދިޔަ އަހަރުގެ ދެވަނަ ކުއާޓަރާ އަޅާބަލާއިރު 15 އިންސައްތަ އިތުރު އަދަދެކެވެ.
ބީއެމްއެލުން ބުނި ގޮތުގައި ނިމިދިޔަ ކުއާޓަރުގައި އެ ބޭންކުން ވަނީ ކަސްޓަމަރުންނަށް ފޯރުކޮށްދޭ ހިދުމަތް ފުޅާކުރުމަށް ޑިޖިޓަލް ބޭންކިން އެސިސްޓެންޓް 'އާޔާ' ތައާރަފުކޮށްފައި ކަމުގައެވެ. ކަސްޓަމަރުން ސްކޭމްއިން ރައްކާތެރިކުރުމަށާއި ސެކިއުރިޓީ އިތުރަށް ހަރުދަނާ ކުރުމަށް އަޅަމުންދާ ފިޔަވަޅުތަކުގެ ތެރެއިން ޓޫ ފެކްޓަ އޮތަންޓިކޭޝަން (ޓޫއެފްއޭ) އިންޓަނެޓް އަދި މޯބައިލް ލޮގިން ތައާރަފުކުރުމާ އެކު، އިންޓަނެޓް ބޭންކިން އަދި ކާޑުތަކުގެ ހިދުމަތް ކަސްޓަމަރުން އަމިއްލައަށް ވަގުތުން މެދުކަނޑާލެވޭ 'ކިލް ސްވިޗް' އަހަރުގެ ދެވަނަ ކުއާޓަރުގައި ތައާރަފުކުރެވިފައިވާ ކަމަށް ބީއެމްއެލުން ބުނެއެވެ.
ބީއެމްއެލުން ބުނީ މިދިޔަ މެއި މަހު އެ ބޭންކުން އެމެރިކަން އެކްސްޕްރެސް އާ ގުޅިގެން އަހަރު ދުވަހަށް ދެމިގެންދާ 'އެކްސްޕީރިއަންސް މޯލްޑިވްސް' ޑެސްޓިނޭޝަން ކެމްޕެއިން ތައާރަފުކޮށްފައިވާ ކަމަށެވެ. މިއީ އެމެރިކަން އެކްސްޕްރެސް ކާޑު މެންބަރުންނަށް ހާއްސަ އަދި ތަފާތު ތަޖުރިބާތަކެއްކޮށްލުމުގެ ފުރުސަތު ހޯދައިދިނުމަށް ތައާރަފު ކުރެވުނު ކެމްޕެއިނެއް ކަމަށް އެ ބޭންކުން ބުނެއެވެ.
ބީއެމްއެލުން ބުނެފައިވަނީ ނިމިދިޔަ ކުއާޓަރުގައި އެ ބޭންކުން ނ. މާފަރާއި ނ. މިލަދޫގައި އަލަށް ސެލްފް ސާވިސް ބޭންކިން ހިދުމަތް ތައާރަފުކޮށްފައިވާ ކަމަށެވެ. މި އަހަރުގެ ދެވަނަ ކުއާޓަރުގައި އެ ބޭންކުގެ އަހަރީ އާންމު ޖަލްސާ ބާއްވާފައިވާއިރު، އެ ޖަލްސާގައި ހިއްސާދާރުން ހިއްސާގެ ފައިދާގެ ގޮތުގައި ބެހުމަށް ހުށަހެޅުނު 215 މިލިއަން ރުފިޔާ (ހިއްސާއަކަށް 40 ރުފިޔާ) ދިނުމަށް ފާސްކޮށްފައިވާ ކަމަށް ބީއެމްއެލުން ބުނެއެވެ.
ބީއެމްއެލުން ބުނި ގޮތުގައި މުޅި ރާއްޖެ ހިމެނޭ ބޭންކިން ވިއުގައަކާ އެކު، 20 އަތޮޅުގައި 38 ބްރާންޗާއި 87 ސެލްފްސާވިސް ބޭންކިން ސެންޓަރުގެ އިތުރުން 143 އޭޓީއެމް އަދި 200 އަށް ވުރެ ގިނަ ކޭޝް އޭޖެންޓުން ހިމެނޭހެން އެންމެ ޒަމާނީ އޮންލައިން ބޭންކިން ހިދުމަތް ފޯރުކޮށްދެމުންދާ ކަމަށެވެ.
ބީއެމްއެލްގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް އެ ބޭންކުން ބުނެއެވެ.
