ގްރޫޕް ސްޓޭޖުގެ ފަހު މެޗުގައި އިޓަލީގެ މައްޗަށް ސައުތު އެފްރިކާ ޓީމުން ކުރިހޯދީ 3-2 ންނެވެ. މިއީ އަންހެނުންގެ ވޯލްޑް ކަޕެއްގައި އެޓީމުން މޮޅެއް ހޯދި ފުރަތަމަ ފަހަރެވެ. ސައުތު އެފްރިކާގެ އަންހެން ޓީމުން އެންމެ ފުރަތަމަ އަންހެނުންގެ ވޯލްޑް ކަޕްގައި ވާދަކުރީ 2019 ވަނަ އަހަރުއެވެ.
ސައުތު އެފްރިކާ އަތުން ބަލިވުމާއެކު އިޓަލީ ވަނީ މުބާރާތުން ކަޓާފައެވެ. މި މެޗުން އެއްވަރު ކޮށްގެންވެސް ދެވަނަ ބުރަށް ދިއުމުގެ ފުރުސަތު އިޓަލީއަށް އޮތެވެ.
މުބާރާތުގެ ދެވަނަ ބުރުގައި ސައުތު އެފްރިކާ ބައްދަލުކުރަން ޖެހޭނީ ގްރޫޕް އީގެ އެއްވަނަ ނެދަލެންޑްސްއާއެވެ.
ސައުތު އެފްރިކާގެ އިތުރުން ގްރޫޕް ޖީއިން ދެވަނަ ބުރަށް ދަތުރުކުރީ ސްވިޑެންއެވެ. ސްވިޑެން ވަނީ ކުޅުނު ތިން މެޗުވެސް ކާމިޔާބުކޮށްފައެވެ. ސައުތު އެފްރިކާ ދެވަނަ ބުރަށް ދަތުރުކުރީ ގްރޫޕްގެ ދެވަނާގައި ހަތަރު ޕޮއިންޓު ހޯދައިގެންނެވެ. ސައުތު އެފްރިކާ އަތުން ބަލިވި އިޓަލީ މުބާރާތް ނިންމާލަން ޖެހުނީ ތިން ޕޮއިންޓާއެކުއެވެ. އެއް ޕޮއިންޓާއެކު ތާވަލުގެ ފުލުގައި އޮތީ އާޖެންޓީނާއެވެ.
