ޖޫން/ޖުލައި ވިއްސާރައަށް ފަހު، މޫސުން އަލިކޮށްލި ފަހުން މިމަހުގެ 4 ވީ ހުކުރު ދުވަހުން ފެށިގެން އެކިރަށްތަކަށް ދަނީ އުދައަރަމުންނެވެ. އެގޮތުން މާލެ ސަރަހައްދުގެ އެކި ހިސާބުތަކަށް ވަނީ ވަރަށް ބޮޑަށް އުދައާރާފައެވެ.
މާލެ ކޮޅުން ބްރިޖަށް އަރާ ސަރަހައްދު، ބްރިޖްގެ ހުޅުލެ ލައިޓްކައިރިން ހައިވޭއަށް ވަރަށް ބޮޑަށް ރާޅު އަރާފައިވެއެވެ. އަދި ރާޅުގަނޑު ސަރަހައްދާއި، ކާނިވާ ސަރަހައްދާއި އާޓިިފިޝަލް ބީޗް ސަރަހައްދަށް ވެސް ވަރަށް ބޮޑަށް ރާޅުއަރާފައިވެއެވެ.
ކުރިއަށް އޮތް ތިން ދުވަހު ރާއްޖޭގެ ހުރިހާ ހިސާބަކަށް އުދައިގެ އަސަރުކުރާނެ ކަމަށާއި، ބޮޑަށް އުދައިގެ އަސަރުކުރާނީ މެދުރާއްޖެތެރެއާއި، ދެކުނަށް ކަމަށް މެޓު އޮފީހުން ބުނެފައިވެއެވެ.
މިއީ ވައިމަޑުވެ ކަނޑުގައި ބާނީ ބޮޑުވުމުގެ ސަބަބުން އަރަމުންދާ އުދައެއް ކަމަށާއި އަދި ކަނޑުމަތީގެ ބާނީގެ އުސްމިން ހުރީ 2 މީޓަރާއި، 2.5 މީޓަރާ ދެމެދުގައި ކަމަށެވެ.
އުދައިގެ އަސަރު އެންމެ ބޮޑަށް ކުރާނީ މެންދުރުފަހުން 15:00ން 17:30 ކަމަށް މެޓު އޮފީހުން ބުނެފައިވެއެވެ. މޫސުމާ ބެހޭ ގައުމީ އިދާރާއިން ވަނީ އުދައަރާނެ ކަމަށް ލަފާކޮށް ކ.އަތޮޅުން އައްޑޫ ސިޓީއަށް ވައިޓް އެލާޓް ނެރެފައެވެ.
