އިނގިރޭސި ވިލާތުގެ ސައިންސްވެރިންނާއި ތަޖުރިބާކާރުންގެ ޓީމަކުން އެންމެ ޒަމާނީ ޓެކްނޮލޮޖީ ބޭނުންކޮށްގެން ސްކޮޓްލޭންޑްގެ ލޮކް ނެސްގެ އެކި ސަރަހައްދުތައް ވަނީ މި ހަފްތާގައި ހޯދަން ފަށާފައެވެ. އެމީހުން އަންނަނީ ސޮނާރާއި ރާޑަރާއި ތަމަލް އިމޭޖިން ބޭނުންކޮށްގެން މި ގޮތް ނޭނގޭ މަހްލޫގު ހޯދުމަށް މަސައްކަތް ކުރަމުންނެވެ.
މި ފުރޭތައަށް ދީފައިވާ ނަމަކީ "ނެސީ" އެވެ.
މި ޓީމުގެ އިސްވެރިޔަކީ ސްޓީވް ފެލްތަމް އެވެ. އޭނާ މި ފުރޭތަ ހޯދަމުން އަންނަތާ 30 އަހަރަށް ވުރެ ގިނަ ދުވަސް ވެއްޖެއެވެ.
މި ހޯދުމުގެ މަސައްކަތް ކުރިއަށް ގެންދަނީ ލޮކް ނެސް މޮންސްޓާ އިންވެސްޓިގޭޝަން ބިއުރޯ (އެލްއެންއެމްއައިބީ) އިންނެވެ. އެލްއެންއެމްއައިބީ އަކީ މި ފުރޭތަ ހޯދުމަށް ހާއްސަކޮށްގެން އުފައްދާފައިވާ ނޮން ޕްރޮފިޓް ޖަމިއްޔާއެކެވެ.
މި ހޯދުމުގެ މަސައްކަތް އެތައް ހަފުތާއެއް ނަގާނެ ކަމަށް ބެލެވެއެވެ. އެ ޓީމުން މުޅި ލޮކް ނެސް، އެއްކޮށް ބަލާނެއެވެ. އަދި ޑްރޯން ބޭނުންކޮށްގެން ކޯރުތައް ހޯދުމުގެ މަސައްކަތް ވެސް ކުރާނެއެވެ.
އެ ޓީމަށް ފުރޭތަ އުޅުނުކަމުގެ ހެކި ހޯދިއްޖެ ނަމަ އެއީ ސައިންޓިފިކް ގޮތުން ބޮޑު ހޯދުމަކަށް ވާނެއެވެ.
"ނެސީ" ގެ ނަމުން ނަން ދެވިފައިވާ މި ފުރޭތައަކީ ދުނިޔޭގައި އެންމެ މަޝްހޫރު އެއް މަހްލޫގެވެ. ފުރޭތައިގެ ވުޖޫދާ މެދު ގަރުނުތަކެއް ވަންދެން ބަހުސް ކުރެވިފައިވެއެވެ. އެންމެ ފަހުން އެ ޓީމަށް އެ ފުރޭތައަކީ ހަގީގީ އެއްޗެއްކަން ސާބިތުކޮށްދެވިއްޖެ ނަމަ، އެއީ ގުދުރަތީ މާހައުލަ މެދު ވިސްނޭ ގޮތް ބަދަލުވެގެންދާނެ ކަމެކެވެ.
"ނެސީ" އާއި ގުޅޭގޮތުން އެތައް ފިލްމަކާއި، ފޮތްތަކެއް ވެސް ވަނީ މިހާތަނަށް ލިޔެފައެވެ.
