ސީއެންއެމްޓީވީ ގެ "އިތުރު ކާފު" ޕްރޮގްރާމްގައި ވާހަކަދައްކަވަމުން ދުންޔާ ރޭ ވިދާޅުވީ އަޅުގަނޑުމެންނަކީ ފަހުރުވެރި ތާރީހެއް އޮތް މިނިވަން ގައުމެއް ކަމަށާއި، މިއަށް ވުރެ މާފަގީރު ޒަމާނެއްގަ އަދި މިއަށްވުރެ މާ ވަސީލަތްތައް މަދު ޒަމާނެއްގަވެސް އަޅުގަނޑުމެންގެ އަމިއްލަ މިނިވިވަންކަން ދިފާއުކުރުމަށްޓަކައި މަސައްކަތް ކޮށްފައިވާނެ ކަމަށާއި، ތާރީޚަށް ބަލާލުމުން އެކަން ހާމަވާނެކަމަށްވެސް ދުންޔާ ވިދާޅުވިއެވެ.
އަދި ދިވެހިރައްޔިތަކަށް ވީތީވެ ފަހުރުވެރިވާ ކަމަށާއި އަދި ވަކިން ހާއްސަކޮށް ކުޑަ ގައުމަކަށްވެފަ، އަޅުގަނޑުމެންގެ މިނިވަންކަމާއި ސިޔާދަތު ބެލެހެއްޓެމުންދާތީވެ، އެކަމާ ފަހުރުވެރިވެލައްވާ ކަމަށްވެސް ދުންޔާ ވިދާޅުވިއެވެ. މީގެ އިތުރުން ރައީސް މައުމޫންގެ ޒައާމަތުގަ، ދިވެހިރާއްޖެއަކީ އެއްވެސް ގައުމެއްގެ ފައިދަށަށް ވެއްޓުނު ގައުމެއް ނޫންކަމަށާއި، އެހެންނަމަވެސް މިއަދު ފެންނަ މަންޒަރު ވަރަށް ތަފާތުކަމަށް ދުންޔާ ފާހަގަ ކުރެއްވިއެވެ.
އެގޮތުން މިއަދު އަޅުގަނޑުމެންގެ ދިވެހިރާއްޖޭގެ ހާރިޖީ ސިޔާސަތު މިވަނީ އިންޑިއާގެ ދަށުވެފަ ކަމަށާއި، އެކަމުން އަޅުގަނޑުމެން ސަލާމަތް ވާންޖެހޭކަމަށް ދުންޔާ ވިދާޅުވިއެވެ. އަދި މިއީ މިހާރު މިއޮތް ސަރުކާރު ބަދަލުކުރަންޖެހޭ އަނެއް ސަބަބު ކަމަށްވެސް ދުންޔާ ވިދާޅުވިއެވެ.
މީގެ އިތުރުން ރައީސް ޔާމީނުގެ ވެރިކަމުގައި ވެސް ރާއްޖޭގެ ހާރިޖީ ސިޔާސަތު އޮތީ ވަކި ރަނގަޅު ހިސާބެއްގަ ނޫންކަމަށާއި، ހާރިޖީ ވަޒީރުން ކަމުން އިސްތިއުފާ ދެއްވުމުގެ ސަބަބުތަކުގެ ތެރޭގައި އެކަން ހިމެނޭކަމަށްވެސް ރައީސް ޔާމީނުގެ ފުރަތަމަ ހާރީޖީ ވަޒީރުކަންވެސް ކުރެއްވި ދުންޔާ މައުމޫން ވިދާޅުވިއެވެ.
މިސާލު ދައްކަވަމުން ދުންޔާ ދެއްކެވީ ރައީސް ޔާމީނުގެ ސަރުކާރުން ސައުދީ އަރަބިއާއި އެކު ބޭއްވި ގުޅުމުވެ. އަދި އެގުޅުން މާ "ހާއްސަ" ނުވަތަ މާ "ގާތް" ވެ، ދެގައުމެއްގެ ދެމެދުގަ އޮންނަންޖެހޭ ބައިނަލްއަގްވާމީ ގުޅުމަކަށްވުރެ ބޮޑަށް އަމިއްލަވަންތަ، އަދި އޭގައި އަމިއްލަ ފައިދާ ހިމެނޭ ގުޅުމަކަށް ވުމުގެ ނަތީޖާއަކަށް ވެގެން ދިޔައީ ސައުދީގެ އެންގުމަކަށް އީރާނާއެކު އޮތް ސިޔާސީ ގުޅުން ކަނޑާލަންޖެހުނު ކަން ކަމަށްވެސް ދުންޔާ ފާހަގަ ކުރެއްވިއެވެ.
މިހާރު މިފެންނަ މަންޒަރުތަކަކީވެސް ހަމައެކަހަލަ މަންޒަރުތަކެއް ކަމަށާއި އަދި ކުރިއަށްވުރެ ބޮޑަށް މިހާރު ވަކިގައުމެއްގެ ދަށު ވެފަތިބޭ ކަމުގެ އިހުސާސް މިހާރު ކުރެވޭކަމަށްވެސް ދުންޔާ ވިދާޅުވިއެވެ.
މީގެ އިތުރުން މިފަދަ ކަންތައްތަކުން ސަލާމަތްވުމަކީ ގައުމީ ވާޖިބެއްކަމަށާއި، އެއީ ގައުމުގެ މިނިވަންކަމަށް ކުރެވޭ މަސައްކަތެއް ކަމަށާއި، އެކަން ކުރެވޭނީ އެމީހެއްގެ ގައިގަ އިޚުލާސްތެރި އަދި ގައުމީވަންތަ ލޯބި ހުންނަ ބޭފުޅަކަށްކަމަށްވެސް ދުންޔާ ވިދާޅުވިއެވެ.
ކާނަލް (ރިޓަޔާޑް) ނާޒިމް އަކީ އެފަދަ ބޭފުޅެއްކަމަށާއި، ގައުމެއް ހިންގުމަށް ބޭނުންވާ އަޚުލާގާއި، ގައުމީ ވަންތަކަން އަދި ތައުލީމާއި ތަޖުރިބާ ހުރި ބޭފުޅަކަށް ނާޒިމް ވުމަކީ ކުރިއަށް އޮތް ރިޔާސީ އިންތިޚާބުގައި ނާޒިމަށް ވޯޓް ދޭންޖެހޭ ސަބަބު ކަމަށްވެސް ދުންޔާ ވިދާޅުވިއެވެ.
