މިއަދުގެ ހުކުރު ހުތުބާގައި ހާއްސަ ކޮށްފައި ވަނީ ރަހިމުގެ ގުޅުން ދެމެހެއްޓުމަށެވެ.
ހުތުބާގައި ބުނީ މައިންބަފައިން އެމީހުންގެ ދަރިންނަށް ރަހިމުގެ ގުޅުން ކެނޑުމަށް ގޮވައިލާ ގޮވައިލުމަކީ ހިތާމަހުރި ކަމެއް ކަމަށެވެ.
ލޮބުވެތި ރަސޫލާ ވަނީ ރަހިމުގެ ގުޅުން ދެމެހެއްޓުމަށްޓަކައި އަހަރެމެންގެ ނަސަބު ދަސްކުރުމަށް އަންގަވާފައެވެ.
ދީނުގެ ފަރުޟެއް އަދާކުރުމަށްފަހު ކުރެވޭ އެންމެ ބޮޑު ހެޔޮކަމަކީ ރަހިމުގެ ގުޅުން ދެމެހެއްޓުން ކަމަށް ހުތުބާގައި ވަނީ ބުނެފައެވެ.
"ރަހިމުގެ ގުޅުންތައް ދެމެހެއްޓުމަށްޓަކައި ތިޔަބައިމީހުންގެ ނަސަބުތައް ދަސްކުރާށެވެ. ފަހެ ހަމަކަށަވަރުން ރަހިމުގެ ގުޅުން ދެމެހެއްޓުމަކީ ގާތްތިމާގެ މީހުންގެ މެދުގައި ލޯބި ދެމެހެއްޓޭނޭ ކަމެކެވެ. އަތްމަތި ތަނަވަސްކޮށްދޭނޭ ކަމެކެވެ. އަދި އުމުރު ދިގުކޮށްދޭނޭ ކަމެކެވެ." ހުތުބާގައި ބުންޏެވެ.
ރަހިމުގެ ގުޅުން ކަނޑާ މީހުންގެ އަމަލުތައް މާތްﷲ ގަބޫލު ނުކުރައްވާނެ ކަމަށާއި އާހިރަތް ދުވަހުން ލިބޭ އަޒާބުގެ އިތުރުން ދުނިޔެމަތީގައި ވެސް އުގޫބާތް ލިބޭނެކަމަށް ހުތުބާގައި ވަނީ ހަނދާންކޮށްދީފައެވެ.
