މާރިޔާ މިހެން ވިދާޅުވީ މިއަދު ނޫސްވެރިންނާއި ބައްދަލުކޮށް ވާހަކަފުޅުދައްކަވަމުން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ.
ޤުރުއާން ބާވާލެއްވީ އަރަބިން ކަމަށާއި، އަދި ހަދީސްތައް ވެސް ހުރީ އަރަބިން ކަމަށާއި، އެހެންކަމުން ދިވެހި ބަހަކާއި އިސްލާމް ދީނާއި ގުޅުމެއް ނެތް ކަމަށް މާރިޔާ ވިދާޅުވިއެވެ.
ކުދިންނަށް ދިވެހި ބަސް ކިޔައިދޭން އޭ ކިޔާފަ އިސްލާމް ދީން އެބަހުން ކިޔަވައިދިނުމަކީ ކުދިންނަށް އެންމެ ފުރިހަމަ މައުލޫމާތު ލިބޭނެ ގޮތެއްނޫން ކަމަށެވެ.
ކޮންމެ މީހެއްގެ ފޯނުގައިވެސް އޮތީ ތަރުޖަމާ ކަަމަށާއި، ވަގުތެއްވެއްޖިއްޔާ އޮންނަނީ ބަލާލެވޭގޮތަށް ކަމަށެވެ. އަދި މިހާރުގެ ކުދިން ވާހަކަދައްކާ އުޅެނީ އިގިރޭސީ ބަހުން ކަމަށާއި، އެހެން ކަމުން އެކަން ކުރެވެން އެންމެ ރަނގަޅު ގޮތަކީ އެއީ ކަމަށެވެ.
އިސްލާމް މާއްދާ އިގިރޭސީ ބަހުން ކިޔަވައިދޭން ސިލަބަހުގައި ހިމަނާފައިވުމުގެ އެންމެ ބޮޑުބޭނުމަކީ ކުދިންގެ ޝައުގުވެރިކަން އިތުރު ކުރުން ކަމަށެވެ. އަދި ރިސާޗް ހެދޭވަރަށް އިސްލާމް ދީނުގެ ވާހަކަތައް ހުރީ އިގިރޭސިބަހުން ލިޔެވިފައި ކަމަށާއި، އިންޓެނެޓާއި، އެހެނިހެން ސޯސްތަކުން ވެސް މައުލޫމާތު ހޯދުމަށް ފަސޭހަވާނީ އިގިރޭސީ ބަހުން ކިޔަވައިދެވިގެން ކަމަށެވެ.
އިގިރޭސިބަހުން އިސްލާމް މާއްދާ ކިޔަވައިދެވޭ ގޮތް ވެއްޖެ ނަމަ، އިތުރު މައުލޫމާތުތައް ލިބި ކުދިން ކުރިއަށް ދިއުމުގެ ވިސްނުންވެސް އިތުރުވެންދާނެ ކަމަށްވެސް މާރިޔާ ވިދާޅުވިއެވެ.