ރިޔާސީ އިންތިހާބު 2023 އާއި ގުޅިގެން ދިވެހި ފުލުހުންގެ ހިދުމަތުން ކުރިއަށްގެންދާ "އޮޕަރޭޝަން ބްލޫ ވޭވް"ގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންބޮޑީ ވޯން ކެމެރާ އާއެކު ވޯޓުލާ މަރުކަޒު ތެރެ އާއި ޕޯލިން ސިސްޓަމް ތަކުގައި ފުލުހުން ހަރަކާތްތެރިވާނެ ކަމަށާއި އެ ކެމެރާ ބޭނުން ކުރާނީ ގާނޫނުތަކާއި ގަވާއިދުތަކާ އެއްގޮތަށް ކަމަށް ފުލުހުން އިއްޔެ ވަނީ ބުނެފަ އެވެ.
ނޫސްވެރިންނަށް މިއަދު މައުލޫމާތު ދެއްވަމުން އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕޭން އެޖެންޓް އަދި ތަރުޖަމާން މުހައްމަދު ތޮލާލް ވިދާޅުވީ ވޯޓުލާ މަރުކަޒުތަކުގައި ފުލުހުން ބޮޑީ ވޯން ކެމެރާ ބޭނުންކުރުމަކީ ނުރައްކަލެއް ކަމަށާއި އެގޮތަށް އެކަން ކުރެވިގެން ނުވާނެ ކަމަށެވެ.
އޭނާ ވިދާޅުވި ގޮތުގައި ވޯޓުލާ މަރުކަޒުގެ ތެރޭގައި ދިވެހި ފުލުހުންގެ ހިދުމަތުން ބޮޑީ ކެމް ޖައްސައިގެން ތިބި ނަމަ، ވޯޓުލާ ބޫތުގައި ކަންކަން ހިނގަމުންދާ ގޮތުގެ މައުލޫމާތު ޕޮލިސް ކޮމާންޑް ސެންޓަރަށް ލިބޭނެ އެވެ. އަދި އެއީ "ވޯޓު ލައިވް ކުރުން" ކަމަށް ތޮލާލް ވިދާޅުވި އެވެ.
ތޮލާލް އިތުރަށް ވިދާޅުވީ ފުލުހުންގެ އެ އަމަލަކީ ބިރުވެރިކަމެއް ނެތި ވޯޓުލުމަށް ހުރަސް އެޅޭ އަމަލަކަށްވާތީ އެކަން ހުއްޓުވަން ޖެހޭ ކަމަށެވެ. އަދި އިލެކްޝަންސް ކޮމިޝަނުން ފުލުހުންނާ ވާހަކަދައްކައިގެން އެކަން ހުއްޓުވަންޖެހޭނެ ކަމުގައިވެސް ވިދާޅުވި އެވެ.
ރިޔާސީ އިންތިޚާބުގެ ވޯޓުލުން އޮންނާނީ މިމަހުގެ 9 ވަނަ ދުވަހުއެވެ. އިންތިހާބުގެ ދެވަނަ ބުރަކަށް ގޮސްފިނަމަ ވޯޓުލުން އޮންނާނީ މިމަހުގެ 30 ވަނަ ދުވަހުއެވެ.
