ސަންގު ޓީވީން އިސްވެ ރޭ ބިލަބޮންގ ހައި ސްކޫލުގައި ކުރިޔަށް ގެންދިޔަ ރިޔާސީ ކެންޑިޑޭޓުންގެ ބަހުސްގައި ވާހަކަ ދައްކަވަމުން، އުމަރު މިގޮތަށް ވިދާޅުވީ ބޯހިޔާވަހި ކަމާއި ގުޅިގެން ކުރެއްވި ސުވާލާއި ގުޅިގެން އެހެން ކެންޑިޑޭޓުން ދެއްވި ޖަވާބުތަކާއި ގުޅުވައިގެންނެވެ.
"މިދައްކާ ހުރިހަަ ވާހަކަ މިއީ ސްވީޓް ޓޯކް. މިއުޅެނީ މާވަހަރު އޮޑިއެއް ލައްގައިގެންތޯ އަޅުގަނޑުމެންނަށް. ކޮންތާކުންތޯ ފައިސާ ހޯދާނީ އަޅުގަނޑުމެން މިހުރިހާކަމެއް ކުރަން؟ އަނެއްކާ ބޮރޯ ކުރަންވީތޯ؟ އަނެއްކާ ދަރަނި މައްޗަށް ދާންވީތޯ؟ އަނެއްކާ އިންޑިޔާއާ ދިމާލަށް އަތްދިތް ކުރަންވީތޯ؟ ނޫނީ ޗައިނާއާ ދިމާލަށް އަތްދިތް ކުރަންވީތޯ އަޅުގަނޑުމެން؟ ދެކޮޅުޖެހޭ ވާހަކަ އަޅުގަނޑުމެން ދައްކަންވާނީ. އުމަރު ވިދާޅުވިއެވެ.
އަދިވެސް މި މައުޝޫގައި އުމަރު ވިދާޅުވީ މީގެން ކޮންމެ ބޭފުޅަކަށް ވެރިކަން ލިބުނަސް ހައުސިންގ މައްސަލަ ހައްލެއް ނުވާނެ ކަމަަށެވެ. ހައުސިންގް މައްސަލައިގައި ރާއްޖެއަށް ދިމާވި އެންމެ ބޮޑު މައްސަލައަކީ، އެޗްޑީސީ ކިޔާ ކުންފުންޏެއް އުފެއްދުން ކަމަށާއި އެތަނުން ބޭނުން މީހަކަށް ގޯތިތައް ބަހާ ކަޓު ނަގައި ބިންތައް ވިއްކަމުންދާ ކަމަށެވެ. އޭގެ ނަތީޖާއަކީ ދެރަ ނިކަމެތި މީހާއަށް ބޮޑު އަގުގައި ތަންކޮޅެއް ލިބި މުއްސަނދި މީހާއަށް ކުޑަ ކަޓެއްދީގެން ބިން ލިބޭގޮތް ވެގެން ދިޔުން ކަމުގައިވެސް އުމަރު ފާހަގަކުރެއްވިއެވެ.
ޚާރިޖީ ސިޔާސަތާއި ގުޅޭގޮތުން އުމަރު ވިދާޅުވީ، ރާއްޖޭގެ ހާރިޖީ ސިޔާސަތުގެ ކޮންޓްރޯލް މިހާރު ގެއްލިގައިވާ ކަމަށެވެ. އެއީ އިންޑިޔާ ސިފައިން ކުރީގެ ރައީސް ޔާމީންގެ ސަރުކާރުގައި ފޮނުވާލަން މަސައްކަތް ކުރުމުންވެސް ނުގޮސް ރާއްޖޭގައި ތިބި ތިބުން މިކަމުގައި ފާހަގަކޮށްލެވޭ ކަމަށެވެ.
