އޭޝިއަން ގޭމްސް އޮންނާނީ ޗައިނާގެ ހަންގްޒޫގައި މި މަހު 23 އިން އަންނަ މަހުގެ އަށް ވަނަ ދުވަހަށެވެ. އޭޝިއަން ގޭމްސްގައި މި ފަހަރު ރާއްޖޭން ވާދަކުރަން ނިންމާފައިވާ ނުވަ ކުޅިވަރަކީ އެތުލެޓިކްސް (އަންހެން/ފިރިހެން)، ބެޑްމިންޓަން (އަންހެން/ފިރިހެން)، ބާސްކެޓްބޯޅަ ތުރީ އޮން ތުރީ (އަންހެން/ފިރިހެން)، ބީޗްވޮލީބޯޅަ (ފިރިހެން)، ކްރިކެޓް (ފިރިހެން)، އީ-ސްޕޯޓްސް، ޝޫޓިން (އަންހެން/ފިިރިހެން)، ސްވިމިން (އަންހެން/ފިރިހެން) އަދި ޓޭބަލް ޓެނިސް (އަންހެން/ފިރިހެން) އެވެ.
މި ފަހަރުގެ އޭޝިއަން ގޭމްސް އަކީ މިދިޔަ އަހަރު ބާއްވަން ތާވަލުކުރި މުބާރާތެކެވެ. މިދިޔަ އަހަރުގެ ސެޕްޓެމްބަރު މަހު ހަންގްޒޫގައި ބާއްވަން އޮތް ގޭމްސް މި އަހަރަށް ފަސްކުރަން ޖެހުނީ ޗައިނާގައި އޭރު ކޮވިޑް-19ގެ ހާލަތު އޮތްގޮތުންނެވެ.
މި އަހަރުގެ ގޭމްސް ބާއްވަން ނިންމި ތާރީހުގައި ހުރިހާ ކަމެއް ހަމަޖެހިފައިވާއިރު، އެ ގޭމްސް ޕްރޮމޯޓް ކުރުމުގެ އިވެންޓް، "ފަން ރަން" މި އަހަރުގެ ފެބްރުއަރީ މަހު ރާއްޖޭގައި ބާއްވާފައިވެ އެވެ.
