މޯލްޑިވިއަނުން އެމިރޭޓްސް އާއެކު ހެދި އެއްބަސްވުމުގެ ދަށުން ރާއްޖޭގެ 16 މަންޒިލަކަށް ފަސޭހަކަމާ އެކު ދަތުރުކުރެވޭނެއެވެ.
މި ދެ އެއާލައިނުން އެންމެ ފުރަތަމަ އިންޓަލައިން އެގްރީމެންޓެއްގައި ސޮއިކޮށްފައިވަނީ މިދިޔަ އަހަރުގެ ފެބްރުއަރީ މަހުގައެވެ.
މި އެއްބަސްވުމުގެ ދަށުން ދެ އެއާލައިނުން ކޯޑް ޝެއާކުރުމާއި އިންޓަލައިން ނުވަތަ އެއް އެއާލައިނުން އަނެއް އެއާލައިނެއްގެ ހިދުމަތްތައް ވިއްކައި ކަނެޓްޓިވިޓީ އިތުރުކުރުމުގެ އިތުރުން ހޮލިޑޭ ޕެކޭޖްތައް ވިއްކުމުގައި ގުޅިގެން މަސައްކަތް ކުރެވޭނެއެވެ.
މޯލްޑިވިއަން އާއި އެމިރޭޓްސްއިން ހެދި އެއްބަސްވުމުގެ ދަށުން ރާއްޖޭގެ ޑޮމެސްޓިކް އެއާޕޯޓުތަކަށް ދަތުރު ކުރާ ދަތުރުވެރިންނަށް އެއް ޓިކެޓަކުން ދެ އެއާލައިންގެ ދަތުރުތައް ކުރެވޭނެއެވެ.
މި އެއްބަސްވުމުގެ ސަބަބުން އިންޓަނޭޝަނަލް ދަތުރުތަކާއި ޑޮމެސްޓިކް ދަތުރުތައް ގުޅުވާލައިގެން ދަތުރުކުރަން ވަރަށް ބޮޑަށް ފަސޭހަވާނެ ކަމަށް މޯލްޑިވިއަންގެ ޖެނެރަލް މެނޭޖަރު އިބްރާހިމް ހަމްދާން ވިދާޅުވިއެވެ.
އެމިރޭޓްސްގެ ޗީފް ކޮމާޝަލް އޮފިސަރު އަދްނާން ކާޒިމް ވިދާޅުވި ގޮތުގައި މި އެއްބަސްވުން އާކުރެވުމުން ކަސްޓަމަރުންނަށް ދަތުރުކުރުމުގައި މިހާރަށްވުރެ ފަސޭހަވާނެ ކަމަށާއި ރާއްޖެ އައިސް ޑޮމެސްޓިކް ދަތުރުތައް ކުރަން އިތުރަށް ފަސޭހަވާނެ ކަމުގައެވެ.
މި އެއްބަސްވުމުގެ ދަށުން އެމިރޭޓްސްގެ ކަސްޓަމަރުންނަށް ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން އުދުހެވޭނެ ރާއްޖޭގެ ޑޮމެސްޓިކް މަންޒިލުތަކަކީ:
- ބ. ދަރަވަންދޫ
- ގދ. ފަރެސްމާތޮޑާ
- ށ. ފުނަދޫ
- ފުވައްމުލައް ސިޓީ
- ސ. ގަން
- ގއ. ކޫއްޑޫ
- ހދ. ހަނިމާދޫ
- ކުޅުދުއްފުށި ސިޓީ
- ހއ. ހޯރަފުށި
- ގދ. ކާޑެއްދޫ
- ލ. ކައްދޫ
- ޅ. މަޑިވަރު
- ނ. މާފަރު
- ގދ. މާވަރުލު
- ތ. ތިމަރަފުށި
- ރ. އިފުރު
އެމިރޭޓްސްއަކީ ރާއްޖެއަށް އެންމެ ގިނަ ފްލައިޓްތައް ބާއްވާ އެއް އެއާލައިނެވެ. އެ އެއާލައިނުން ވީއައިއޭއަށް އެވްރެޖުކޮށް ދުވާލަކު ހަތަރު ފްލައިޓް ޖައްސައެވެ.
