ސެޕްޓެމްބަރު 30، ގައި އޮންނަ ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ށ. ފުނަދޫއަށް ވަޑައިގައިން ވާހަކަފުޅުދައްކަވަމުން މުއިއްޒު ވިދާޅުވީ، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސިޔާސަތުގެ ތެރެއިން ރާއްޖެއަށް އިގްތިސާދީ ކުރިއެރުން ގެނައުމަށްޓަކައި ރައްޔިތުންގެ މަޖިލިސް މެދުވެރިކޮށް އެސްއީޒެޑްގެ ނަމުގައި ވަރަށް މުހިއްމު ގާނޫނެއް ފާސްކޮށްފައިވާ ކަމަށާއި، އެހެންނަމަވެސް އެގާނޫނޫގެ ދަށުން އިންވެސްޓްމެންޓްތައް ރާއްޖެއަށް ގެނެވިފައިވާ ނުވާކަމަށެވެ.
އެހެންކަމަށްވުމާއެކު، ވެރިކަމަށް އިންތިހާބުވެއްޖެނަމަ، އެސްއީޒެޑްގެ ގާނޫނު ތަންފީޒުކޮށް، އެގާނޫގެ ދަށުން އިންވެސްޓްމަންޓްތަކަށް ފުރުސަތު ހުޅުވާލާނެ ކަމަށް ޑރ. މުއިއްޒު ވިދާޅުވިއެވެ.
މުއިއްޒު ވިދާޅުވީ އެސްއީޒެޑް ގާނޫނުގެ ދަށުން ކަނޑައެޅޭ މުހިއްމު ސަރަހައްދުތަކެއްގައި ސްޕެޝަލް އިކޮނޮމިކް ޒޯންތަކެއް ގާއިމްކޮށް، އިންވެސްޓްމެންޓްތަކަށް ފުރުސަތު ހުޅުވާޅާނެ ކަމަށެވެ. އަދި އެފަދަ ޒޯނުތައް ގާއިމްކުރާނެ ސަރަހައްދުތައް ކަނޑައަޅާނީ ސްޓްރެޓެޖިކް ކޮށް ޕްލޭން ކުރުމަށްފަހު ކަމުގައި ވިދާޅުވި އެވެ.
ރައީސް ޔާމީނުގެ ވެރިކަމުގައި އެސްއީޒެޑް މަޝްރޫއު ކުރިއަށް ގެންދަން ނިންމީ ފ. ހިމިތި އަދި އެ ރަށާއި ގުޅިފައިވާ ފަޅުގަ އެވެ. އެގޮތުން ސައުދީ ސަރުކާރާއި ގުޅިގެން އެ މަޝްރޫއު ހިންގުމަށް މަޝްވަރާތައް ކުރެވުނެވެ. އަދި މި މަޝްރޫއުއަށް ހާއްސަ ބޯޑް އޮފް އިންވެސްޓްމަންޓް އެއް އުފެއްދެވި އެވެ. އެ ބޯޑް އުފެއްދެވިއިރު މިނިސްޓަރ އޮފް ހައުސިންގްގެ މަގާމުގައި ހުންނެވި އަދި މިހާރުގެ ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުއަކީ އެ ބޯޑުގެ މެމްބަރެއްކަން ފާހަގަކޮށްލެވެއެވެ.
