ރާއްޖޭގެ ވެރިކަން ކުރުމުގެ ނިޒާމު ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓެއް ނެގުމަކީ، ނިމިދިޔަ ރިޔާސީ އިންތިހާބުން 15839 ވޯޓާއެކު ތިންވަނައަށް ދިޔަ ދަ ޑިމޮކްރެޓްސް އިން ކޯލިޝަން އެއް ހެދުމަށް މެދުވެރިކުރާ އެއްމެ މުހިއްމު ޝަރުތެވެ.
މީގެ ކުރިން ޑިމޮކްރެޓްސްގެ ފަރާތުން ރައީސް ނަޝީދު އެޕާޓީގެ އާއްމު މެމްބަރުންނާއި ބައްދަލުކުރަައްވައި ދެއްކެވި ވާހަކަ ފުޅެއްގައި، އެ ޕާޓީގެ ފަރާތުން، ރިޔާސީ އިންތިހާބުގެ ދެވަނަ ބުރުގައި ވާދަކުރާ ދެ ޕާޓީއަށްވެސް އެ ހުށަހެޅުން ހުށަހަޅާފައިވާ ކަމަށާއި، އެހެންނަމަވެސް، އިދިކޮޅު ޕީއެންސީގެ ފަރާތުން އެ ހުށަހެޅުމަށް އެއްބަސްވުމެއްގައި ސޮއި ކުރުމަށް އިންކާރުކުރާ ކަމަށް ބުނެފައެވެ. ވުމާއެކު، އެޕާޓީއިން މިހާރު ވާހަކަ ދައްކަމުން އަންނަނީ ހަމައެކަނި އެމްޑީޕީއާއި އެކު ކަމަށް ރައީސް ނަޝީދު ވަނީ ވިދާޅުވައެވެ.
އަދި މިއަދުގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ ވެރިކަމުގެ ނިޒާމް ބަދަލުކުރުމަށް، ރައްޔިތުންގެ ފެންނަ ނުފެންނަ ވޯޓަކަށް އެހުމަށް، އެ ޕާޓީއިން ހުށަހަޅާފައިވާ ގަރާރަށް ބަހުސް ކުރަން އަވަސްކުރުމަށް އެމްޑީޕީގެ ޕީޖީ ލީޑަރު އެއްބަސްވެފައިވާ ކަމަށް ބުނެފައެވެ.
މިކަމާއި ގުޅިގެން ރާއްޖޭގެ މީޑިއާއަކަށް ދެއްވި ބަސްދީގަތުމެއްގައި، އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވީ، ނިޒާމް ބަދަލު ކުރުމާ ގުޅޭ ވޯޓެއް ކުރިޔަށް އޮތް ހަފްތާއެއްހާ ދުވަހުގެ ތެރޭގައި ނެގުމަކީ ކުރެވިދާނެ ކަމެއް ކަމަށް ގަބޫލު ނުކުރައްވާ ކަމަށާއި އޭގެ ސަބަބުން ދެވަނަ ބުރުގެ އިންތިހާބަށް ވެސް ވަރަށް ބޮޑަށް ނުފޫޒު ފޯރާނެ ކަމަށެވެ.
މިކަމާއި ގުޅިގެން ސީއެންއެމް އިން އެމްޑީޕީގެ ޕީޖީ ލީޑަރު އަދި ރައްޔިތުންގެ މަޖިލީހުގެ އައްޑޫ އަތޮޅު ހިތަދޫ އުތުރު ދާއިރާގެ މެމްބަރުގެ އިތުރުން ކުރިއަށް އޮތް ރިޔާސީ އިންތިހާބުގައި ރައީސް ސޯލިހުގެ ރަނިންގްމޭޓަކަށް ކަނޑައަޅުއްވާފައިވާ މުހައްމަދު އަސްލަމް އާއި ގުޅާލުމުން، ފޯނަށް ޖަވާބު ނުދެއްވާތީވެ، އެމްޑީޕީގެ ޕީޖީ ލީޑަރު އަސްލަމް އަދި ޑިމޮކްރެޓްސްގެ ޕީޖީ ލީޑަރު އާޒިމް އާއި ދެމެދު ކުރެވުނު މަޝްވަރާތަކާއި ގުޅޭ ކޮމެންޓެއް ލިބިފައެެއް ނުވެއެވެ.
ނަމަވެސް ދެ ޕާޓީގެ މަޝްވަރާތަކަށް ފަހު ނިޒާމީ ވޯޓުގެ މައްސަލައިގައި ފެހި ސިގްނަލް ލިބިފައިވާ ކަމަށް ވެރިކަން ކުރާ އެމްޑީޕީ އަދި ޑިމޮކްރެޓްސްގެ ލީޑާޝިޕްގެ އިސް ބޭފުޅުން ވަނީ "ސީއެންއެމް" އަށް ކަށަވަރު ކޮށްދީފައެވެ.
އިންތިހާބަށް ފަހު ނިޒާމީ ވޯޓެއް ނަގަން އެމްޑީޕީން އެއްބަސްވިއިރު، ދެވަނަ ބުރުގައި ޑިމޮކްރެޓްސްއިން ތާއީދު ކުރާނެ ކެންޑިޑޭޓެއް ކަނޑައެޅުމަށް ބާއްވާ އިންޓެރިމް ކައުންސިލްގެ ބައްދަލުވުން އޮތީ މިރޭ 9:00އަށް ތާވަލު ކޮށްފައެވެ. އެ ބައްދަލުވުމުގައި ޑިމޮކްރެޓްސްއިން ދެވަނަ ބުރުގައި ޕާޓީއަކާ އިއްތިހާދުވުމާ ގުޅޭ ގޮތުން ރަސްމީ ނިންމުމެއް ނިންމާނެއެވެ.
