
ރާއްޖޭގައި ވެރިކަން ކުރުމުގެ ނިޒާމަކީ ބަރުލަމާނީ ނިޒާމުކަމަށް ކަނޑައެޅުމާ މެދު ފެންނަ ނުފެންނަ ވޯޓެއް ނަގަން ގޮވާލައި ހުޅުދޫ ދާއިރާގެ މެމްބަރު އިލްޔާސް ލަބީބު ހުށަހެޅުއްވި ގަރާރުގެ ބަހުސަށް ހުޅުވައިލުމުގެ ކުރިން ނަޝީދު ވިދާޅުވީ ފެންނަ ނުފެންނަ ވޯޓު ނެގުމުގެ ބާރު މަޖިލީހަށް ލިބިދީފައި ވަނީ ގާނޫނު އަސާސީގެ 70 ވަނަ މާއްދާއިން ކަމަށެވެ.
އަދި ކަމަކާއި މެދު ކަމަކާމެދު ފެންނަ ނުފެންނަ ވޯޓެއް ނަގަން މަޖިލީހުން ފާސްކުރުމުން އެ ވޯޓު ނެގުމަކީ އިލެކްޝަންސް ކޮމިޝަނުން ކުރަން ޖެހޭނެ ކަމެއް ކަމަށާއި، އެއީކީ އެއްވެސްހާލެއްގަ ރައީސުލްޖުމްހޫރިއްޔާގެ ދައުރެއް އޮތް ކަމެއް ނޫންކަމެއް ކަމަށް ނަޝީދު ވިދާޅުވިއެވެ.
މީގެ އިތުރުން ވަކި ކަމެއް ކުރުމަށް ރައްޔިތުންގެ މަޖިލީހުން ފާސްކޮށްފި ނަމަ ދެން އެކަމުގައި އަމަލުކުރަންޖެހޭނެ ގޮތަކީ ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށްޓަކައި އިލެކްޝަންސް ކޮމިޝަން (އީސީ) އަށް ހުށަހެޅުން ކަމަށް ނަޝީދު ވިދާޅުވި އެވެ.
އަދި ރައްޔިތުންގެ ހާއްސަ މަޖިލީހުގެ 93 ވަނަ ޖަލްސާގައި އާންމު ވޯޓެއް ނެގުމަށް އޭރު ފާސްކޮށްފައިވާ ލިޔުމެއް ވެސް މެމްބަރުންގެ ސަމާލުކަމަށް ގެންނަވައި، އޭރު އިލެކްޝަން ކޮމިޝަނެއް ނެތްކަންވެސް ފާހަގަ ކުރައްވައިފައެވެ.
ނަޝީދު ވިދާޅުވީ ފެންނަ ނުފެންނަ ވޯޓު ނެގުމުގެ ބާރު އެ މާއްދާއިން މަޖިލީހަށް ލިބިދީފައި އޮތް އިރު އެފަދަ ވޯޓެއް ނެގުމުގެ ބާރު ރައީސުލް ޖުމްހޫރިއްޔާއަށް ލިބިދީފައި އޮތީ ގާނޫނު އަސާސީގެ 115 ވަނަ މާއްދާއިން ކަމަށެވެ.
މަޖިލީހުގެ މިއަދުގެ ޖަލްސާގެ ފުރަތަމަ ހުސްވަގުތުކޮޅަށް މެދުކަނޑައިލުމުގެ ކުރިން ނަޝީދު ވިދާޅުވީ އިލްޔާސް ހުށަހެޅުއްވި ގަރާރުގެ ހުރިހާ މަސައްކަތެއް ނިމެންދެން މިއަދުގެ ޖަލްސާ ކުރިއަށް ގެންދަވާނެ ކަމަށެވެ.