ނިޒާމީ ވޯޓު ނެގުމަށް ހުޅުދޫ ދާއިރާގެ ޑިމޮކްރެޓްސްގެ މެމްބަރު އިލްޔާސް ލަބީބް ހުށަހަޅުއްވާފައިވާ ގަރާރަށް މުޅި މަޖިލީހުގެ ކޮމިޓީގައި ވާހަކަދައްކަވަމުން، ކުރީގެ ޑެޕިއުޓީ އެޓާނީ ޖެނެރަލްކަން ވެސް ކުރެއްވި އުޝާމް ވަނީ ގަރާރެއް ފާސްކޮށްގެން ނިޒާމީ ވޯޓެއް ނަގަން މަސައްކަތް ކުރާއިރު، އެކަމުގައި ގިނަ ގާނޫނީ ސުވާލުތަކެއް އުފެދޭކަން ފާހަގަކުރައްވާފަ އެވެ.
އެހެންކަމުން މިހާރު މަޖިލީހުން ކުރިއަށް ގެންދަން އުޅޭ ޕްރޮސެސްއާ މެދު އުފެދޭ ސުވާލުތަކެއް އެބަހުރި ކަމަށް ވެސް އޭނާ ވިދާޅުވި އެވެ.
ރާއްޖޭގައި ވެރިކަންކުރާނެ ނިޒާމެއް އަލުން ކަނޑައަޅަން ފެންނަ ނުފެންނަ ވޯޓެއް ނެގުމަކީ ރައްޔިތުންގެ މަޖިލީހުން ފާސްކުރާ ގަރާރަކުން ކުރެވިދާނެ ކަމެއް ކަމަށް ގަބޫލުނުކުރައްވާ ކަމަށް އުޝާމް ވިދާޅުވިއިރު، ވެރިކަމުގެ ނިޒާމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓަކަށް ދިޔުމުގެ ކުރިން އެ ކަމުގެ އުސޫލުތަކާއި އެކަން ކުރިއަށް ގެންދާނެ ގޮތް ބަޔާން ކުރާ ގާނޫނެއް ފާސްކުރުން މުހިންމު ކަމަށް، ނިޒާމީ ބަދަލަކަށް ވަކާލާތުކުރާ ޑިމޮކްރެޓްސްގެ އިންގާލީ ޗެއާޕާސަން ހަސަން ލަތީފު މިއަދު ވިދާޅުވެފަ އެވެ.
ހަސަން ވެސް ވިދާޅުވީ ގާނޫނެއް ނެތި ވޯޓަކަށް ގޮސްފިނަމަ ފެންނަ ނުފެންނަ ވޯޓަށް ފަހު އަމަލުކުރަންވީ ގޮތްތަކާ މެދު ސުވާލުތަކެއް އުފެދުމުގެ ފުރުސަތު އެބަ އޮތް ކަމަށެވެ.
ރައްޔިތުންގެ މަޖިލިހުގެ ހުޅުދޫ ދާއިރާގެ މެންބަރު އިލްޔާސް ލަބީބް ހުށަހެޅުއްވި ގަރާރުގައި ވާގޮތުން ނިޒާމީ ވޯޓު ނެގުމަށް ހުށަހަޅާފައިވަނީ މި އަހަރުގެ ނޮވެމްބަރު 30 ވަނަ ދުވަހުގެ ކުރިންނެވެ.
ކުރިއަށް އޮތް ރިޔާސީ އިންތިހާބުގެ ދެވަނަ ބުުރުގައި އެއްވެސް ޕާޓީއަކަށް ތާއިދުކުރުމަށް ނަޝީދު އިސްވެ އުޅުއްވާ ޑިމޮކްރެޓްސްއިން، ވަކިި ޝަރުތުތަކެއް ކަނޑައަޅައި ވަނީ ޕާޓީ ތެރެއިން ވެސް ވަކި ގަރާރެއް ފާސްކޮށްފައެވެ.
އިލެކްޝަންސް ކޮމިޝަނުން ވެސް ބުނެފައިވާ ގޮތުގައި މި މަހު ވޯޓު ނެގުުމަކީ ކުރެވޭނެ ކަމެއް ނޫނެވެ. އިންތިހާބުގެ ކުރިން ރައްޔިތުން ހޭލުންތެރިކުރުމަށް އެއް މަސް ދުވަސް ބޭނުންވާނެ ކަމަށް އީސީގެ ނައިބު ރައީސް އިސްމާއީލް ހަބީބް އިއްޔެ ވަނީ ވިދާޅުވެފަ އެވެ.
