ނިޒާމީ ވޯޓު ނެގުމަށް ހުޅުދޫ ދާއިރާގެ ޑިމޮކްރެޓްސް ޕާޓީގެ މެމްބަރު އިލްޔާސް ލަބީބް ހުށަހަޅުއްވާފައިވާ ގަރާރާ ގުޅޭގޮތުން މުޅި މަޖިލީހުގެ ކޮމިޓީގައި ކުރިއަށް ގެންދިޔަ ބަހުސްގެ ތެރެއިން އޭނާ ވަނީ އެ ގަރާރަށް އިސްލާހެއް ހުށަހަޅުއްވައިފަ އެވެ.
އެގޮތުން އޮކްޓޯބަރު މަހުގެ 30 ވަނަ ދުވަހު، ރާއްޖޭގައި ވެރިކަން ކުރުމުގެ ނިޒާމު ބަދަލުކުރުމާ މެދު ރައްޔިތުންގެ ހިޔާލު ހޯދަން އާންމު ވޯޓެއް ނެގުމަށް ސީދާ މަޖިލީހުން އީސީ އަށް އެންގުމަށް އިލްޔާސް ލަބީބު އިސްލާހު ހުށަހެޅުއްވިއެވެ.
މުޅި މަޖިލީހުގެ ކޮމިޓީގައި ދިރާސާކުރަމުންދިޔަ އެގަރާރަށް އިލްޔާސް ލަބީބު ހުށަހެޅުއްވި އިސްލާހު ފާސްވީ ކޮމިޓީގައި ބައިވެރިވެވަޑައިގެންނެވި މެމްބަރުންގެ ތެރެއިން އެމްޑީޕީއަށް ނިސްބަތްވާ މެމްބަރުންގެ ތާއީދާއެކު، 31 މެމްބަރުންގެ އިއްތިފާގުންނެވެ.
އެއާއެކު މަޖިލީހުގެ ޖަލްސާ ފަށައި، ޑިމޮކްރެޓްސްގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި ގަރާރު ދިރާސާކޮށް މުޅި މަޖިލީހުގެ ކޮމިޓީން އެކުލަވާލި ރިޕޯޓް ފާސްކުރީ ވެރިކަންކުރާ އެމްޑީޕީގެ މެމްބަރުންގެ ތާއީދާއެކު، 35 މެންބަރުންގެ ވޯޓުންނެވެ. ގަރާރު ފާސްކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ.
މި ގަރާރު މަޖިލީހުގެ ތަޅުމުން ފާސްކޮށްފި ނަމަ، އިލެކްޝަންސް ކޮމިޝަނަށް އެ ވޯޓު ނެގުމަށް އަންގާނީ މަޖިލީހުންނެވެ. އެހެންނަމަވެސް، ރައީސް ސޯލިހު ވަނީ ނިޒާމީ ވޯޓު ނެގޭނީ، މަޖިލީހުގެ ޖުމްލަ 87 މެންބަރުންގެ ތެރެއިން ހަތަރު ބައިކުޅަ ތިން ބައިގެ ނުވަތަ 66 މެންބަރުންގެ ވޯޓާ އެކު ފާސްކުރުމަށް ފަހު ތަސްދީގުކުރުމަށް އެ މަނިކުފާނަށް ފޮނުވުމުން، އެ މަނިކުފާނު އިލެކްޝަންސް ކޮމިޝަނުގައި އެދިވަޑައިގަތުމުން ކަމަށް މީގެ ކުރިން ވިދާޅުވެފައެވެ.
އަދި އެގޮތަށް ފާސްކޮށް މަޖިލީހުން ފޮނުވައިފި ނަމަ، އިލްޔާސްގެ ގަރާރުގައިވާ ގޮތަށް، އަންނަ މަހުގެ 30ގެ ކުރިން އެ ވޯޓު ނެގުމަށް، މި މަހުގެ 30ގައި ބާއްވާ ރިޔާސީ އިންތިހާބުގެ ދެ ވަނަ ބުރުގެ ކުރިން އިލެކްޝަންސް ކޮމިޝަންގައި އެދިވަޑައިގަންނަވާނެ ކަމަށް ވެސް ރައީސް ސޯލިހު ވިދާޅުވެފައިވެއެވެ.
