ރިޔާސީ އިންތިހާބުގެ ދެވަނަ ބުރުގެ ކެމްޕެއިނުގައި އައްޑޫ ސިޓީއަށް ކުރެއްވި ދަތުރުފުޅުގައި ބޭއްވެވި ޖަލްސާއެއްގައި ރައީސް ވިދާޅުވީ އިންތިހާބުގެ ފުރަތަމަ ބުރުގައި އެކުގައި ތިއްބެވި ބައެއް ފަރާތްތަކުން ދުރަށް ޖެހިލީމާ ބައެއް ބޭފުޅުން ކުޑަކޮށް މާޔޫސްވެދާނެ ކަމަށެވެ. އެކަން އެގޮތަށް ވީނަމަވެސް އެކަމާ މެދު ކަންބޮޑުނުވުމަށް ރައީސް ވިދާޅުވިއެވެ.
ރައީސް ވިދާޅުވެފައިވަނީ އެ ފަރާތްތަކުން ފުރަތަމަ ބުރުގައި ކޮށްދިން މަސައްކަތްތައް އެނގޭ ކަމަށާއި އެކަންކަމަށް ޝުކުރު އަދާކުރައްވާ ކަމަށެވެ. އެ ބޭފުުޅުންނަށް ހެޔޮ ރަނގަޅު މުސްތަގުބަލަކަށް އެދޭ ކަމަށް ރައީސް ވިދާޅުވިއެވެ. ރައީސް ވިދާޅުވި ގޮތުގައި ކަންތައް ކޮންމެ ގޮތަކަށް ވިޔަސް އުންމީދުތައް އުޖާލާ ކަމުގައެވެ.
އިންތިހާބުގެ ދެވަނަ ބުރާ މެދު ގޮތް ނިންމި ފަރާތްތަކަށް މިހާރު ނިންމާފައިވާ ނިންމުމަކީ ރަނގަޅު ނިންމުމެއް ނޫން ކަމަށް ލަސްތަކެއް ނުވެ އެ ބޭފުޅުންނަށް ފެނިވަޑައިގަންނަވާނެ ކަމަށް ރައީސް ވިދާޅުވިއެވެ.
ރައީސް ވަނީ އެހެން ހިނގާ ކަންކަމާ މެދު ކަންބޮޑުނުވެ، ކުރިއަށް ދިއުމަށް އިލްތިމާސް ކުރައްވާފައެވެ. ރިޔާސީ އިންތިހާބު ކާމިޔާބު ކުރެވޭނެ ކަމަށް ވިދާޅުވާ ވިދާޅުވުން މިއަދުވެސް ރައީސް ވަނީ ތަކުރާރު ކުރައްވާފައެވެ.
ރިޔާސީ އިންތިހާބުގެ ދެވަނަ ބުރު އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާއިރު ރައީސް އާ ވާދަކުރައްވާ ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުވެސް ދަނީ ތާއީދު އިތުރުކުރެއްވުމަށް ރަށްތަކަށް ދަތުރު ކުރައްވަމުންނެވެ.
