މަނަދޫ ދާއިރާގެ މެންބަރު އަހްމަދު ހާރޫނު މަޖިލީހަށް ހުށަހަޅާފައިވާ މި ބިލުގެ މަގުސަދުތަކުގެ ތެރޭގައި ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރެވޭނެ ދާއިރާތައް ކަނޑައެޅުމާއި އިންވެސްޓްމަންޓް އެޕްރޫވަލް އަދި ލައިސަންސް ދިނުމުގެ އުސޫލުތައް ކަނޑައެޅުން ހިމެނެ އެވެ.
މީގެ އިތުރުން އިންވެސްޓަރުންގެ ޒިންމާ އާއި އިންވެސްޓަރުންނަށް ލިބޭ ހިމާޔަތާއި ރައްކާތެރިކަމުގެ ދާއިރާތައް ކަނޑައެޅުން ހިމެނެ އެވެ.
މި ބިލުގައި ވަނީ ފޮރިން އިންވެސްޓްމަންޓްގެ ލައިސަންސް ހިފެހެއްޓޭނެ އަދި ބާތިލުކުރެވޭނެ ހާލަތްތައް ބަޔާންކޮށްފަ އެވެ.
ހާއްސަ ހާލަތްތަކެއްގައި އިންވެސްޓްމަންޓް ދައުލަތަށް ނެގޭނެ ހާލަތްތަކެއް މި ބިލުގައި ހިމަނާފައިވެ އެވެ. އޭގެ ތެރޭގައި ދައުލަތުގެ އާންމު މަންފާއެއް ހާސިލުކުރުން ނުވަތަ ރާއްޖޭގެ ސަރަހައްދުގެ ރައްކާތެރިކަން ދެމެހެއްޓުން ހިމެނެ އެވެ.
މީގެއިތުރުން މި ބިލުގައި ވަނީ ރާއްޖޭގައި ފޮރިން އިންވެސްޓްމަންޓެއް ހިންގާ ފަރާތަކުން ކުރުން މަނާ ކަންތައްތަކާއި، ޤާނޫނާ ހިލާފުވާ އިންވެސްޓަރުންނާމެދު ފިޔަވަޅުއަޅަންވާނެ ކަމަށްވެސް ބަޔާންކޮށްފައެވެ. އަދި ފޮރިން އިންވެސްޓްމަންޓް ދައުލަތަށް ނަގާއިރު އެކަށޭނަ ބަދަލު ދޭންވާނެ ކަމަށް މި ބިލުގައި ވަނީ ހިމަނާފަ އެވެ.
މި ބިލުގައި އިތުރަށް ބުނެފައިވަނީ ބޭރުގެ އިންވެސްޓަރުން ރާއްޖޭގައި އިންވެސްޓްކުރުމަށް ޝައުގުވެރިކަން އުފައްދައި އިތުރުކުރުމަށްޓަކައި، ބައިނަލްއަޤްވާމީ މައިދާނުގައި އިންވެސްޓްމަންޓް ޕްރޮމޯޓްކުރުމުގައި އަމަލުކުރާނެ އުސޫލުތައް އެކުލަވާލައި، އިންވެސްޓްމަންޓް ޕްރޮމޯޓް ކުރުމުގެ މަސްއޫލިޔަތު އަދާކުރާނީ މިނިސްޓްރީންކަމަށެވެ.
މި ބިލު ގާނޫނަކަށްވެ އަމަލުކުރަން ފެށުމާއެކު "ދިވެހިރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ގާނޫނު" އުވާލުމަށްވެސް މި ބިލުގައި ހިމަނާފައިވެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި ބިލުގެ ފުރަތަމަ ކިޔުން އިއްވާފަ އެވެ.
