ކްރިމިނަލް ކޯޓަށް ހުށަހަޅާފައިވާ މައްސަލައަކާ ގުޅިގެން އެ ކޯޓަށް ހާޒިރު ކުރަން ބޭނުންވެ ދެ މީހުންގެ ފޮޓޯއާ ވަނަވަރު ހާމަކޮށްފައިވާ ދެ މީހުންނަކީ ހިތަދޫ، ސްޕަންޖުގެ، މަރްޔަމް އަޝްފާ (29އ) އާއި ނ. ވެލިދޫ، ގުލިސްތާނުގެ، އާއިޝަތު ރިޒްނާ (39އ) އެވެ.

މި ދެ މީހުންގެ މައްޗަށް ދައުލަތުން ކުރި ހަށިވިއްކުމުގެ ކުށުގެ މި ދައުވާ ސާބިވެ ދެ މީހުން ޖަލަށްލާން ކްރިމިނިލް ކޯޓުންވަނީ ހުކުމްކޮށްފައެވެ. މި މައްސަލަ ކުރިއަށް ގެންގޮސްފައިވަނީ އާއްމުކޮށް ހުޅުވާނުލައި ކަމުން ޝަރީއަތުގެ ތަފްސީލެއް ނޭނގެއެވެ. 

ކްރިމިނަލް ކޯޓުން ބުނީ ދެ މީހުންވެސް ތުހުމަތުތަކަށް އިންކާރު ކުރިކަމަށެވެ. އެހެންނަމަވެސް ދައުލަތުން ހުށަހެޅި ހެކިތަކުން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކޮށްފައިވާ ފަދައިން، މީހަކު ކުށެއް ކޮށްފިކަން އެކަށީގެންވާ މިންވަރެއްގެ ޝައްކެއްނެތި ޝަރީޢަތަށް ސާބިތުކުރުމަށް ބޭނުންވާ މިންވަރަށް ޝަރީޢަތަށް ހެކި ލިބިފައިވާތީ، ދެ މީހުންވެސް ކުށްވެރިއްޖެކަމަށް ކަނޑައަޅައި، ކޮންމެ މީހަކު 04 (ހަތަރެއް) މަހާއި 24 (ސައުވީސް) ދުވަހުގެ މުއްދަތަށް ޖަލަށްލުމަށް ޙުކުމްކޮށްފައިވާ ކަމަށެވެ.

މި މައްސަލަ ބަލައި ނިޔާ ކަނޑައެޅީ – ގާޒީ އަލްއުސްތާޒު ހުސައިން ފާއިޒް ރަޝާދުއެވެ.