އެމްއެމްއޭއިން އާންމުކޮށްފައިވާ ޕޭމެންޓްސް ބުލެޓިންގައިވާ ގޮތުގައި މިހާތަނަށް ދޫކޮށްފައިވާ ކާޑުތަކުގެ 74 އިިންސައްތަ ކާޑު އަދިވެސް އެކްޓިވް ކަމަށެވެ.
އެމްއެމްއޭއިން ބުނީ ޑެބިޓް ކާޑުގެ ތެރެއިން 48 އިންސައްތައަކީ ވިސާ ކާޑު ކަމަށެވެ. އަދި 24 އިންސައްތައަކީ މާސްޓަކާޑު ކަމަށާއި 22 އިންސައްތައަކީ އެމެރިކަން އެކްސްޕްރެސް (އެމެކްސް) ކަމަށެވެ.
ކްރެޑިޓް ކާޑުގެ ތެރެއިން 64 އިންސައްތަ ނިސްބަތްވަނީ ވިސާ ކާޑަށްވާއިރު، 28 އިންސައްތައަކީ އެމެކްސް ކާޑެވެ. ބޭންކްތަކުން ދޫކުރާ ޕްރިޕެއިޑް ކާޑުގެ 99 އިންސައްތައަކީ މާސްޓަކާޑެވެ.
ރާއްޖޭގެ ބޭންކްއަކުން ޑެބިޓް ކާޑު އެންމެ ފުރަތަމަ ތައާރަފު ކޮށްފައިވަނީ 2000 ވަނަ އަހަރެވެ. އަދި 2004 ވަނަ އަހަރު ވަނީ ކްރެޑިޓް ކާޑު ތައާރަފުކޮށްފަ އެވެ.
އެއް އަހަރުން އަނެއް އަހަރަށް ކާޑުގެ މުއާމަލާތްތައް އިތުރުވަމުން އަންނައިރު މިދިޔަ އަހަރު 46 މިލިއަން ޓްރާންސެކްޝަން ކާޑުތަކުން ކޮށްފައިވެ އެވެ. އެއީ 18 ބިލިއަނެއްހާ ރުފިޔާގެ މުއާމަލާތެވެ. އޭގެ ތެރެއިން 17 ބިލިއަން ރުފިޔާގެ ޓްރާންސެކްޝަން ހިންގާފައިވަނީ ޑެބިޓް ކާޑުތަކުންނެވެ. އަދި ބާކީ އެއް ބިލިއަން ރުފިޔާގެ މުއާމަލާތް ހިންގީ ކްރެޑިޓް ކާޑުތަކުންނެވެ. އޭގެ ކުރީ އަހަރު ކާޑު ބޭނުންކޮށްގެން ހިންގި 39 މިލިއަން ޓްރާންސެކްޝަނުން 16 ބިލިއަން ރުފިޔާގެ މުއާމަލާތް ހިންގާފައިވެ އެވެ.
ރާއްޖޭގެ ބޭންކްތަކުން ކަސްޓަމަރުންނަށް ކާޑު ދޫކުރަން ފެށިފަހުން މިހާތަނަށް 1.2 މިލިއަން ކާޑު ވަނީ ދޫކޮށްފައި.
މިދިޔަ އަހަރު އެކަނި ބޭންކްތަކުން 750 ޑެބިޓް ކާޑު ދޫކޮށްފައިވާއިރު، އޭގެ ތެރެއިން 64 އިންސައްތައަކީ އެކްޓިވް ނުވަތަ ބޭނުން ކުރަމުން އަންނަ ކާޑުތަކެވެ.
ކާޑުތަކުގެ މުއާމަލާތްތަކުގެ 85 އިންސައްތައަކީ ޕީއޯއެސް ނުވަތަ ކާޑު މެޝިނުން ހިންގާފައިވާ މުއާމަލާތްތަކެވެ. ބާކީ 15 އިންސައްތަ ކާޑު މުއާމަލާތް ހިންގީ އޮންލައިންކޮށެވެ.
ނަގުދު ފައިސާގެ ބަދަލުގައި ކާޑާއި އޮންލައިން ޓްރާންސެކްޝަންތައް މެދުވެރިކޮށް މާލީ މުއާމަލާތްތައް ހިންގަމުން އަންނަ ނިސްބަތް އެއް އަހަރުން އަނެއް އަހަރަށް އަންނަނީ އިތުރުވަމުންނެވެ. އެގޮތުން މިދިޔަ އަހަރު އެއް އެކައުންޓުން އަނެއް އެކައުންޓަށް ފައިސާ ފޮނުވުމުގެ މުއާމަލާތްތައް 563 ބިލިއަން ރުފިޔާއަށް ވަނީ އަރާފަ އެވެ. އެއީ 2019 ވަނަ އަހަރާ އަޅާބަލާއިރު 60 އިންސައްތައިގެ އިތުރުވުމެކެވެ.
