މުއްދަތު ހަމަވާ ތާރީހު 24 ގަޑިއިރަށްވުރެ އިތުރަށް ހުންނަ ކާބޯތަކެތި ތައްޔާރުކުރެވޭނީ ބޭސިކް ފުޑް ސޭފްޓީ ނުވަތަ އެ އެޖެންސީން ހިންގާ ކާބޯތަކެތީގެ ރައްކާތެރިކަމުގެ ތަމްރީނު ޕްރޮގްރާމް ނިންމާފައިވާ މީހުންނަށް އެފްޑީއޭއިން ބުނެއެވެ.
އެ އިދާރާއިން މިއަދު ވަމީ "އާމްދަނީ ހޯދުމަށް ގޭގައި ކާބޯތަކެތި ތައްޔާރުކުރުމުގައި އަމަލު ކުރަންވީ ގޮތުގެ މިންގަނޑު" ވެސް އާންމުކޮށްފައެވެ.
އެ މިންގަނޑުގައި ކާބޯތަކެތި ތައްޔާރުކުރާ ބަދިގެ ހުންނަންޖެހޭ ގޮތާއި ހިފާ ގެންގުޅޭ ސާމާނާއި އާލަތްތަކުގައި ފުރިހަމަވާންޖެހޭ ޝަރުތުތައް އަދި ކާބޯތަކެތި ތައްޔާރުކުރާ މީހުންގެ އާއްމު ސާފުތާހިރުކަން ބަހައްޓަންވީ ފަދަ ގޮތްތައް ވަނީ ކިޔައިދީފައެވެ.
ބަންދުކުރި ކާބޯތަކެތި ލޭބަލްކުރުމުގެ ގައުމީ މިންގަނޑާ އެއްގޮތަށް ލޭބަލްކުރުމަކީ އާއްމު ޝަރުތުގެ ބައެއްގެ ގޮތުގައިވެސް ވަނީ ހިމަނާފައެވެ.
އަތްދޮވުމާއި ހިފާގެންގުޅޭ ސާމާނު ދޮވެ ސާފުކެވޭނެ އިންތިޒާމު ވެސް ބަދިގޭގައި ހުންނަންޖެހެއެވެ. އާމްދަނީ ހޯދުމަށް ކާބޯތަކެތި ތައްޔާރު ކުރުމަށް ވަކި ތެލި ތަށި ފަދަ ތަކެތި ހާއްސަކުރުން ވެސް ޖެހެއެވެ.
ރޯނުފިލުވައި ހުންނަ ކާބޯތަކެއްޗާއި އެނޫން ކާބޯތަކެއްޗަށް ވަކި ހާއްސަ ތަށި ސަމުސާ ފަދަ ތަކެތި ބޭނުންކުރުންޖެހެއެވެ. އެ ކަންކަމަށް ވަކި ތަށި ސަމުސާ ނެތް ނަމަ ރޯނުފިލުވައި ހުންނަ ކާބޯތަކެއްޗަށް ބޭނުންކުރި ތަކެތި ރަނގަޅަށް ދޮވެ ޑިސްއިންފެކްޓު ކުރުމަށްފަހު ބޭނުންކުރަންޖެހެއެވެ.
