އެގްރިކަލްޗަ މިނިސްޓްރީން ބުނީ މި ބައްދަލުވުމުގައި ރާއްޖޭގެ ރުއްތަކަށް މިހާރު ފެތުރެމުންދާ ބައްޔާއި ބަލި ކޮންޓްރޯލުކުރުމަށް އަޅާނެ ފިޔަވަޅުތަކާއި ރާއްޖޭގައި މިހާރު ހުރި ރުއްތަކުގެ އުފެއްދުންތެރިކަމުގެ ހާލަތާއި ރުއް އިންދާ އާލާކުރާނެ ގޮތާއި ރާއްޖޭގެ ރުކުގެ ސިނާއަތަށް އާރޯކަން ގެނައުމަށް ކުރެވެންހުރި ކަންކަމުގެ އިތުރުން ކާށީގެ ވެލިއުއެޑެޑް އުފެއްދުންތަކާ ބެހޭ ގޮތުން FAO އިން މި މަޝްރޫއަށް ކަނޑައަޅާފައިވާ، ކަމާ ގުޅޭ ފަންނީ ތިން މާހިރުން މައުލޫމާތުދީފައިވާ ކަމަށެވެ. މި ބައްދަލުވުމުގައި ކަމާ ގުޅުންހުރި ތަފާތު މުއައްސަސާތަކުން 54 ފަރާތެއް ބައިވެރިވި ކަމަށް އެ މިނިސްޓްރީން ބުނެ އެވެ.
ރާއްޖޭގެ ރުއްތަކުގެ އުފެއްދުންތެރިކަމާ ބެހޭ މަޝްވަރާ ބައްދަލުވުން ވަނީ ބާއްވާފައި - ފޮޓޯ:އެގްރިކަލްޗަ މިނިސްޓްރީ
އެގްރިކަލްޗަ މިނިސްޓްރީން ބުނެފައި ވަނީ މި ޓީމުން މިދިޔަ އޮގަސްޓް މަހުގެ 18 ވަނަ ދުވަހުން ފެށިގެން ސެޕްޓެމްބަރު މަހުގެ ފަސްވަނަ ދުވަހަށް ހއ، ހދ، ށ، ކ، އއ، އދ، ލ، ޏ އަދި އައްޑޫސިޓީއަށް ދަތުރުކޮށް، ރުއްތަކުން ސާމްޕަލް ނަގައިގެން ބަލީގެ ތަހުލީލުކޮށްފައިވާ ކަމަށެވެ. މީގެ އިތުރުން ރާއްޖޭގައި މިހާރު ހުރި ރުއްތަކުގެ ހާލަތު ދިރާސާކޮށް، އުފެއްދުންތެރިކަމުގެ މިންވަރު ދެނެގަނެ، ރާއްޖޭގެ ރުކުގެ ސިނާއަތަށް އާރޯކަން ގެނައުމަށް ކުރެވެން ހުރި ކަންކަންވެސް ވަނީ ދެނެގަނެފައި ކަމަށް އެގްރިކަލްޗަ މިނިސްޓްރީން ބުނެ އެވެ.
