ނަޝީދުގެ އިތުބާރު ނެތްކަމުގެ މައްސަލަގައި މަޖިލިސް ހުއްޓި އޮތުމަށް ފަހު، ސުޕްރީމް ކޯޓުގެ ހުކުމާއެކު ވެސް މައްސަލަ ކުރިއަށް ގެންދާކަށް ރައީސް ނަޝީދުގެ ޕާޓީން ފުރުސަތެއް ނުދިނެވެ. އެއް ގޮތުން ނޫނީ އަނެއް ގޮތުންވިޔަސް މަޖިލިސް ހުއްޓުވާފައި ބޭއްވުމަށް ފަހު، ނަޝީދު މިއަދު އެދިވަޑައިގެންނެވީ ބަޖެޓްގެ މަސައްކަތް އެޖެންޑާ ކޮށްދެއްވުމަށެވެ.
ރައްޔިތުންގެ މަޖިލީހުގެ އަމީންއާންމަށް ނަޝީދު ފޮނުއްވި ސިޓީއެއްގައި ވަނީ މާލީ އަހަރު ފެށުމުގެ ދެ ދެ މަސް ކުރިން ފެށޭ އަހަރަށް ލަފާކުރާ ދައުލަތުގެ ބަޖެޓު ހުށަހަޅަން ޖެހޭކަން ފާހަގަކުރައްވައިފަ އެވެ. އެގޮތަށް, ބަޖެޓު ހުށަހެޅުމަށް އެޖެންޑާ ކުރި ނަމަވެސް ފިނޭންސް މިނިސްޓަރު އިބްރާހިމް އަމީރު އެ ދުވަހުގެ ޖަލްސާއަށް ހާޒިރުވެވަޑައިގަނެފައި ނުވާ ކަމަށް ނަޝީދުގެ ސިޓީގައި ވިދާޅުވެފައިވެ އެވެ.
"ގާނޫނުއަސާސީ އާއި ގާނޫނުގައި ލާޒިމުކޮށްފައިވާ ތާރީހަށް ފިނޭންސް މިނިސްޓަރު މަޖިލީހަށް ހުށަހެޅުން މިހާރު ލަސްކުރައްވާފައިވުމާއި, ސުޕްރީމް ކޯޓުގެ ހުކުމުގައިވާ ފަދައިން އެކަން އިތުރަށް ލަސްކުރެވެން ނޯންނާނެތީ, ދައުލަތުގެ ބަޖެޓު ހުށަހެޅުން ދެން އެންމެ އަވަހަށް ބާއްވާ ޖަލްސާގެ ފުރަތަމަ ކަމެއްގެ ގޮތުގައި އެޖެންޑާ ކޮށްދެއްވުމަށް ދެންނެވީމެވެ," ނަޝީދުގެ ސިޓީގައި ލިޔުއްވާފައިވެ އެވެ.
ނަޝީދު މިގޮތަށް އެދިވަޑައިގަނެފައި ވާއިރު އެމަނިކުފާނާ ދެކޮޅަށް ހުށަހަޅާފައިވާ އިތުބާރު ނެތްކަމުގެ މައްސަލަ އީވާ އާއި އަފީފު ވަނީ ހުއްޓުވައިފަ އެވެ. މަޖިލީހުގެ ރައީސާއި ނައިބު ރައީސް ނިސްބަތްވެވަޑައިގަންނަވަނީ ނަޝީދު އެމްޑީޕީން ވަކިވެ އުފެއްދެވި ދަ ޑިމޮކްރެޓްސްއަށެވެ.
