ދިވެހި ފުލުހުންގެ ހިދުމަތުން ބުނީ މިއަދު ހަވީރު 5:30 ހާއިރު ފުވައްމުލަކު ރަންވޭ މަތީގައި އޮތް ބޯޓެއްގައި ކާގޯ އުފުލާ ވެހިކަލެއް ޖެހި އެކްސިޑެންޓެއް ހިނގާފައިވާ ކަމަށް ރިޕޯޓުކޮށްފައިވާ ކަމަށެވެ.
އެކްސިޑެންޓުގައި އަނިޔާވި މީހާއަށް ފުވައްމުލަކު ހޮސްޕިޓަލުގައި ފަރުވާ ދެމުން އަންނަ ކަމަށް ފުލުހުން ބުނެ އެވެ. އެހެންނަމަވެސް އޭނާއަށް ލިބިފައިވާ އަނިޔާގެ ތަފްސީލެއް އަދި ނުލިބެ އެވެ.
ފުވައްމުލަކު އެއާޕޯޓުގައި އޮތް މޯލްޑިވިއަންގެ ބޯޓުގައި ކާގޯ ވެހިކަަލެއް ޖެހި ހިނގި އެކްސިޑެންޓުގައި އަނިޔާވި މީހާ ސްޓްރެޗާއަށް އަރުވަނީ - ފޮޓޯ:އެމްޑީޕީ
މި އެކްސިޑެންޓާ ގުޅިގެން އެވަގުތު ފްލައިޓަށް އަރަން ތިބި ފަސިންޖަރުން ބޯޑިން އޭރިއާގައި މަޑުކުރުވާފައިވާ ކަމަށް މައުލޫމާތު ލިބެ އެވެ.
މީސް މީޑިއާގައި ދައުރުވަމުން އަންނަ ފޮޓޯތަކުން ފެންނަނީ އަނިޔާވި މީހާއަށް ފަރުވާދޭން ސްޓްރެޗާއަކަށް އަރުވާ ތަނެވެ. މި އެކްސިޑެންޓާ ގުޅިގެން މޯލްޑިވިއަންގެ ބޯޓަށް ވަނީ ގެއްލުން ވެފަ އެވެ.
