ރީޖަނަލް އެއާޕޯޓްސްއަކީ ސަރަހައްދީ އެއާޕޯޓްތަކާ ބެހޭ ސަރުކާރުގެ ރަސްމީ ކުންފުންޏެވެ. މިނިސްޓްރީ އޮފް ފިނޭންސްއިން ރީޖަނަލް އެއާޕޯޓް ކުންފުންޏާއެކު ވެފައިވާ އެއްބަސްވުމުގެ ދަށުން، އެއާޕޯޓް ހިންގުމުގެ ބާރުތަށް ވަނީ ރީޖަނަލް އެއާޕޯޓް ކުންފުންޏާ ހަވާލުކޮށްފަ އެވެ.
ފ. އަތޮޅު މަގޫދޫގައި އެމްޑީޕީ ސަރުކާރުން 230 މިލިއަން ރުފިޔާ ހަރަދު ކޮށްގެން ތަރައްގީކުރަމުން ގެންދާ އެއާޕޯޓުގައި މިހާރު ކުރިއަށްދަނީ ރަންވޭ ބޮޑުކުރުމުގެ މަސައްކަތެވެ.
މި އެއާޕޯޓް ތަރައްގީ ކުރަނީ ޖެޓްތައް ޕާކްކުރެވޭނެ ޕާކިން ސަރަހައްދު އަދި ޖެޓް ފިއުލް ފާމަކާ އެކުގަ އެވެ. އޭގެ އިތުރުން ޖެޓްތަކުގައި އަންނަ ކުރޫން މަޑުކުރެވޭނެ ހޮޓަލެއް އެއާޕޯޓާއެކު ގާއިމްކުރުމަށް ވެސް ވަނީ ނިންމައިފަ އެވެ.
މި މަސައްކަތް އަންނަ އަހަރުގެ ފުރަތަމަ ކުއާޓާގައި ނިންމާލެވޭނެ ކަމަށާއި، ރާއްޖޭގައި އޮތް އެންމެ ފުރިހަމަ އެއް އެއާޕޯޓަށް މަގޫދޫ އެއާޕޯޓް ވެގެންދާނެ ކަމަށް ރީޖަނަލް އެއާޕޯޓްސް ކުންފުނިން ބުނެ އެވެ.
މަގޫދޫ އެއާޕޯޓު އެޅުމަށް އެމްޓީސީސީއާ ހަވާލުކުރީ އޮކްޓޯބަރު، 2022، ގައެވެ. އެ ކުންފުންޏާއެކު ސޮއިކުރީ 1500 މީޓަރު ދިގު، 30 މީޓަރު ފުޅާ ރަންވޭއެއް ހަދައި، ޕަސެންޖާ ޓާމިނަލަށް އިމާރާތެއް ހަދައި، ކޮންޓްރޯލް ޓަވަރާއެކު ފަޔާ ސްޓޭޝަނެއް ހެދުމަށެވެ. ނަމަވެސް ރައީސް އިބްރާޙީމް މުހައްމަދު ސޯލިހު ވަނީ މަގޫދޫ އެއާޕޯޓުގެ ރަންވޭ 1،800 މީޓަރުގެ ރަންވޭއަކަށް ބޮޑުކުރަން ނިންމަވާފަ އެވެ.
