އާ ސަރުކާރުގެ ހައުސިން މިނިސްޓަރު ޑރ. އަލީ ހައިދަރު އިއްޔެ ބޭއްވި ނޫސްވެރިންގެ ބައްދުލުވުމުގައި ވިދާޅުވީ، "މޫދުން ގޯތި ދިނުންމުން" މިކަމުގައި ގާނޫނީ ސުވާލުތަކެއް އުފެދޭތީ ބަންޑާރަ ނައިބުގެ ގާނޫނީ ލަފައެއް ހޯއްދަވާނެ ކަމަށެވެ.

އަދި ފުރަތަމަ ބުރާއި ދެވަނަ ބުރާ ދޭތެރޭ ދޫކޮށްފައިވާ ފްލެޓާއި ބިންތަކާ ގުޅޭގޮތުން ޝަކުވާއެއްވާނަމަ އެކަން ރިވިއު ކުރައްވާނެ ކަމަށް މިނިސްޓަރު ވިދާޅުވި އެވެ.

ގާނޫނީ ލަފާ ހޯއްދެވުމަށް ފަހު، އެއީ ދެވޭނެ އެއްޗެއް ނޫން ކަމަށް ލަފާ ލިބިއްޖެ ނަމަ، ނުހިއްކާ އޮތް ތަން ތަނުން ދިން ގޯތިތަކުގެ ރަޖިސްޓްރީ ބާތިލުވާނެތޯ ނޫސްވެރިއަކު ސުވާލު ކުުރުމުން ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ވެސް ހައުސިން މިނިސްޓަރުކަން ކުރެއްވި ޑރ. ހައިދަރު ވިދާޅުވީ "ދެން އަޅުގަނޑުމެން ބަލާނީ ހައްގުވާ ބަޔަކަށް ގޯތި ދޭނީ ކޮން ތާކުންތޯ" އެވެ. އަދި ވިދާޅުވީ އެންޓި ކޮރަޕްޝަން ކޮމިޝަނުން ހުއްޓުވާފައި އޮތް އެ ސްކީމާ ގުޅޭ ކަންކަމުގައި ގާނޫނީ ލަފާ ވެސް ހޯއްދަވާނެ ކަމަށެވެ. 

ހައުސިން މިނިސްޓަރު ޑރ. އަލީ ހައިދަރު: ވިދާޅުވީ ޝަކުވާއެއް އޮތްނަމަ ރައީސް ސޯލިހުގެ ސަރުކާރުން ދޫކުރި ބިމާއި ފްލެޓު ލިސްޓު ރިވިއުކުރާނެ ކަމަށް - ފޮޓޯ:ހައުސިން މިނިސްޓްރީ

ކުރީގެ ސަރުކާރުގެ ބިންވެރިޔާ ސްކީމްގެ ދަށުން ހުޅުމާލެ 2 އާއި ހުޅުމާލެ 3 އާއި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ވެސް ވަނީ ދޫކޮށްފައިވެ އެވެ. އަދި މިހާރު ހިއްކާ ނިމިފައި ހުރި ބިންތަކުން ބިންކަނޑާ ބިން ހަވާލު ވެސް ކުރި އެވެ. ހުޅުމާލެ 3 އާއި ގުޅިފަޅު އަދި ގިރާވަރުފަޅުގެ ބިން ހިއްކާ ނުނިމުނު ނަމަވެސް ވަނީ ގަވާއިދަށް ބަދަލު ގެނެސްގެން ބިމުގެ ރަޖިސްޓްރީ ވެސް ހަވާލުކޮށްފަ އެވެ. 

"ބަންޑާރަ ގޯއްޗާއި އަމިއްލަ ގޯއްޗާއި އެފަދަ ގޯތީގައި ހަދާ އިމާރާތް ރަޖިސްޓަރީ ކުރުމާބެހޭ ގަވާއިދު" އަށް ކުރީ ސަރުކާރުން ގެނައި އިސްލާހުގެ ދަށުން ގޯތި ދޫކުރާއިރު، ނުހިއްކާ ނުވަތަ އިން ނުކަނޑާ އޮތް ތަނަކުން ވެސް ގޯތި ދޫކުރެވިދާނެ އެވެ.

ހައުސިން މިނިސްޓަރު މިހެން ވިދާޅުވި އިރު ރިޔާސީ އިންތިހާބުގެ ކެމްޕެއިންގައި ރައީސް ޑރ. މުއިއްޒު ވަނީ އޭރުގެ ސަރުކާރުން، ސިޔާސީ ވިސްނުމެއްގައި ވިޔަސް، އެއްވެސް ރައްޔިތަކަށް ދޭން ބުނި އެއްޗެއް އަތުލުމެއް ނޯންނާނެ ކަމަށް ވިދާޅުވެފައި އެވެ.