ރައްޔިތުންގެ މަޖިލިހުގެ މި އަހަރުގެ ތިންވަނަ ދައުރުގެ 24 ވަނަ ޖަލްސާގައި ދައުލަތުން އަންނަ އަހަރަށް ލަފާ ކުރާ ބަޖެޓަށް ކުރި ބަހުސްގައި ވާހަކަ ދައްކަވަމުން މީކާއިލް ވިދާޅުވީ މި ސަރުކާރުގެ ހުރިހާ ވަޒީރުންނަށް ރުހުން ދޭން އެމްޑީޕީން ތްރީލައިން ވިޕެއް ނުނެރެން އެދިވަޑައިގަންނަވާ ކަަމަށެވެ. އަދި އެކަން ކުރުމަށް ވިޕެއް ނެރުނު ކަމުގައި ވީނަމަވެސް މިނިސްޓަރަށް ރުހުން ދޭން ވޯޓު ނުދެއްވާނެ ކަމަށް މީކާއީލް ވިދާޅުވި އެވެ.
އާ ވަޒީރުންގެ މަޖިލީހަށް އައްޔަންކުރެއްވި 22 ބޭފުޅުންނަށް ރުހުން ދިނުމަށް އެދި ރައްޔިތުންގެ މަޖިލިހަށް ފޮނުވި މައްސަލަ މަޖިލިހުގެ ކަމާ ބެހޭ ކޮމިޓީއަށް މިހާރު ވަނީ ފޮނުވާފަ އެވެ.
މިއަދުގެ ޖަލްސާގައި ބަހުސް ކުރައްވަމުން މީކާއިލް ވިދާޅުވެފައި ވަނީ މިއީ ރައީސް ޑރ. މުހައްމަދު މުއިއްޒަށް ބާރެއް ލިބޭ ކޮންމެ ފަހަރަކުވެސް ކަންކުރައްވާ ގޮތް ކަމަށެވެ. އެގޮތުން ރައީސް ޑރ. މުއިއްޒު ހައުސިން މިނިސްޓަރު ކަމުގައި ހުންނަވައިގެން އެމްޑީޕީގެ ފުރަތަމަ ސަރުކާރުން އެޅި ގާކޮށި ފުލެޓުތައް ކޮމާޝަލް ރޭޓުގައި ވިއްކާލުމުގެ އިތުރުން ގުޅީފަޅަކީ މީހުންނަށް ދިރިނޫޅެވޭ ތަނެއް ކަމަށް ކަނޑައަޅާ އެ ތަނުން ދިން ގޯއްޗާއި ފުލެޓުތައް ބާތިލުކުރިކަން މީކާއިލް ފާހަކުރެއްވި އެވެ.
އިއްޔެ ހައުސިން މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު ވަނީ "ގެދޮރުވެރިޔާ" ސްކީމުގެ ދަށުން ފްލެޓުތައް ދޫކުރުމަށް އެކުވާލި ލިސްޓު ރިވިއު ކުރުމަށް ނިންމާފައިވާ ކަމަށް ވިދާޅުވެފަ އެވެ. އަދި "ބިންވެރިޔާ" ސްކީމުގެ ދަށުން ދޫކޮށްފައިވާ ބައެއް ގޯތިތަކުގެ ރަޖިސްޓްރީ ދެވިގެން ނުވާނެ ކަމަށާއި ދޫކޮށްފައިވާ ރަޖިސްޓްރީތަކުގެ ސައްހަކަމާ ގުޅޭގޮތުން މިނިސްޓަރު ވަނީ ސުވާލު އުފައްދަވާފަ އެވެ.
