ކޮމިޓީން ލަފާއަރުވަން ނިންމާފައިވަނީ ރަށު ކައުންސިލް މެންބަރުންގެ މުސާރަ 33 އިންސައްތައަށް ބޮޑުކުރުމަށެވެ.

ލާމަރުކަޒީ ކޮމިޓީގެ މުގައްރިރު އަދި ހުޅުމާލެ ދާއިރާގެ މެންބަރު އަލީ ނިޔާޒް ވަނީ ކައުންސިލްތަކުގެ މުސާރައިގެ އޮނިގަނޑަށް އައިސްފައިވާ ބަދަލަށްބަލާއިރު ރަށު ކައުންސިލްތަކުގެ މެންބަރުންގެ މިހާރުގެ މުސާރައަކީ އިދާރީ މުވައްޒަފުންގެ މުސާރައާއި ބަލާއިރު އެއްހަމަ ކުރެވިފައިވާ މުސާރަތަކެއް ނޫންކަމަށް ވިދާޅުވެފައެވެ.
 ރަށު ކައުންސިލް މެންބަރުންގެ މުސާރަ އިދާރީ މުވައްޒަފުންގެ މުސާރައަށްވުރެ ކުޑަވުމަކީ ހަމަޖެހޭ އުސޫލެއް ނޫންކަމަށް އަލީ ނިޔާޒު ވިދާޅުވިއެވެ. 

 ކޮމިޓީން ވަނީ ކައުންސިލްގެ ރައީސްއާއި ނާއިބު ރައީސް އަދި މެންބަރުންގެ މުސާރައަށް ގެންނަ ބަދަލު ކަނޑައަޅާފައެވެ.

ލާމަރުކަޒީ ކޮމިޓީން މާލިއްޔަތު ކޮމެޓީއަށާއި، ބަޖެޓު ކޮމެޓީއަށް ލަފާދިނުމަށް ނިންމީ ލޯކަލް ކައުންސިލްތަކުގެ އިދާރީ މުވައްޒަފުންގެ މުސާރަ މިދިޔަ އޮކްޓޫބަރު މަހުގެ އެއްވަނަ ދުވަހުން ފެށިގެން 35 އިންސައްތަ ބޮޑު ކުރުމުން، ކައުންސިލުގެ އިދާރީ އިސް މުވައްޒަފުންގެ މުސާރައާއި ރަށު ކައުންސިލަރުންގެ މުސާރަ އެއްހަމަ ނުވަތަ އެއަށްވުރެ ބޮޑުވެފައިވާތީ އެކަމާއި ގުޅިގެން މެންބަރުން ކަންބޮޑުވުން ފާޅުކުރެއްވުމުންނެވެ.