އެ ކުއްލި މައްސަލައިގެ ގަރާރު މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް ނަސީމެވެ. މަޖިލީހުގެ 29 މެންބަރުންގެ ވޯޓުން ގަރާރު ބަލައިގަނެ މިހާރު ވަނީ ބަހުސް ފަށައިފަ އެވެ.
ބަހުސްގެ ވަގުތުގައި މެންބަރު މީކާއިލް ވިދާޅުވީ، މި ސަރުކާރުގެ އަސްލު ކުލަ މިހާރު ވެސް ފެނިއްޖެ ކަމަށެވެ. ކެމްޕެއިން ދުވަސްވަރު ރައްޔިތުންނަށް ރައްޔިތުންނަށް ދީފައިވާ އެއްވެސް ގޯއްޗެއް އަދި ފުލެޓެއްވެސް އަތުނުލާނެ ކަމަށް ބުނެ ދެއްކި ވާހަކައާ ޚިލާފަށް އަމަލުކުރަމުންދާ ކަމަށް ވިދާޅުވި އެވެ.
އެހެންކަމުން މީކާއިލްގެ ކުއްލި މައްސަލާގައި ގޮވާލެއްވީ ހައުސިން މިނިސްޓަރުގެ ހަގީގީ ސިޔާސަތު ހާމަކުރުމަށާއި ލިޔުން ލިބިފައިވާ ފަރާތްތަކަށް ވީ އެންމެ އަވަހަށް ފްލެޓާއި ގޯތި ދިނުމަށް ގޮވާލާފައިވެ އެވެ.
މީގެ ކުރިން ވެސް މެންބަރު މީކާއިލް ވަނީ މަޖިލީހަށް ހުށަހަޅާފައިވާ އަންނަ އަހަރުގެ ބަޖެޓަށް ބަލައިލުމުން އެނގެނީ މާލޭ ރައްޔިތުންގެ ބޯހިޔާވަހިކަން ފޭރިގަންނަން އުޅޭ ކަން ކަމަށް ވިދާޅުވެފައެވެ. އަދި، މި ސަރުކާރުގެ ހައުސިން މިނިސްޓަރަށް ރުހުން ނުދޭން ވެސް ގޮވާލައިފައެވެ.
މިދިޔަ ސަރުކާރުން ހުޅުމާލެ އާއި ގުޅީފަޅު އަދި ގިރާވަރުފަޅުން ވަނީ ގޯތި ދޫކޮށް ބައެއް މީހުން ރަޖިސްޓްރީ ހަވާލުކޮށްފަ އެވެ. އަދި 4،000 ޕްލެޓް މަޝްރޫއުގެ ދަށުން ފްލެޓް ލިބޭ މީހުންގެ ލިސްޓް ވެސް އޭރުގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ނެރުނެވެ. ނަމަވެސް، ފްލެޓް ހަވާލުކުރުމުގެ މަސައްކަތް އެންމެ ފަހު ވަގުތު އެންޓި ކޮރަޕްޝަން ކޮމިޝަނުން ހުއްޓުވި އެވެ.
އާ ހައުސިން ހައިދަރު މިނިސްޓަރު ވިދާޅުވި ގޮތުގައި ފްލެޓް ލިސްޓް މި ސަރުކާރުން މުރާޖައާ ކުރާނެ އެވެ. އެއްވެސް ގޯއްޗެއް އަތުނުލި ކަމުގައިވިޔަސް ބައެއް ގޯތިތަކުގެ ލޮކޭޝަން ބަދަލު ކުރަން ޖެހިދާނެ ކަަމަށް މިނިސްޓަރު ވަނީ ވިދާޅުވެފަ އެވެ.
މިނިސްޓަރު އިތުރަށް ވިދާޅުވީ ފްލެޓްތަކާ ގުޅިގެން އޭސީސީ އިން ބައެއް ކަންކަން ބަލަން ބޭނުންވާތީ ފްލެޓް ޕޯޓަލްއަށް ވަނުމުގެ އެކްސެސް އެ ކޮމިޝަނަށް ދީފައިވާނެ ކަމަށެވެ. އެއްވެސް މީހަކަށް ލިބިފައިވާ ފްލެޓެއް އަތުލުމަކީ އާ ސަރުކާރުގެ ވިސްނުމެއް ނޫން ކަމަށާއި އޭސީސީ އިން މައްސަލަ ނިންމުމުް ޝަރުތު ހަމަވާނަމަ އެންމެންނަށްވެސް ފްލެޓް ލިބޭނެ ކަމުގައިވެސް ވިދާޅުވި އެވެ.
