ރައީސް އޮފީހުން މިއަދު އެކްސްގައި ކުރި ޕޯސްޓެއްގައި ބުނީ ރައީސް ކުރައްވާ ރަސްމީ ދަތުރުފުޅުތަކަށް ދައުލަތުގެ ބަޖެޓުން ހިނގާ ހަރަދުތަކުގެ މައުލޫމާތު ކޮންމެ ދަތުރުފުޅެއް ނިމޭތާ 15 ދުވަހުގެ ތެރޭގައި ހާމަކުރައްވާ ގޮތަށް ރައީސް ޑރ. މުއިއްޒު ނިންމާފައިވާ ކަމަށެވެ.
ރައީސްގެ މި ނިންމެވުމަކީ ރަސްމީ ދަތުރުފުޅުތަކުގެ މައުލޫމާތު ހޯދަން އަބަދުވެސް ނޫސްވެރިން ވަރަށް މަސައްކަތްކުރަން ޖެހޭކަން އެމަނިކުފާނަށް އެނގިވަޑައިގަންނަވާތީ ނިންމެވި ނިންމެވުމެއް ކަމަށް ރައީސް އޮފީހުން ބުނެ އެވެ.
ރައީސުލްޖުމްހޫރިއްޔާކަމުގެ މަގާމާ ހަވާލުވެވަޑައިގަތުމަށް ފަހު ޑރ. މުއިއްޒު އެންމެ ފުރަތަމަ ރަސްމީ ދަތުރުފުޅެއްގައި ވަޑައިގަތީ ތުރުކީވިލާތަށެވެ. އެ ދަތުރުފުޅުގައި ގިނަ ދާއިރާތަކަކުން އެހީތެރިކަން ފޯރުކޮށްދޭނެކަމުގެ ޔަގީންކަން އެ ގައުމުގެ ރައީސް ވަނީ ދެއްވާފަ އެވެ.
އެ ދަތުރުފުޅަށްފަހު ރައީސް ވަނީ ތިމާވެށްޓާއި މޫސުމީ މައްސަލަތަކުގެ ދާއިރާއިން ދުނިޔޭގައި ބާއްވާ އެންމެ ބޮޑު ސަމިޓް، ކޮޕް-28 ގައި ބައިވެރިވެވަޑައިގަތުމަށް ޔުނައިޓެޑް އަރަބް އެމިރޭޓްސްގެ ދުބާއީއަށް ވަޑައިގެންފަ އެވެ.
އެ ދަތުރުފުޅު ނިންމަވާލެއްވުމަށްފަހު މާދަމާ ރައީސް ޑރ. މުއިއްޒު ރާއްޖެ ވަޑައިގަންނަވާނެ އެވެ.
