ތުރުކީވިލާތަށާއި ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މިއަދު ރާއްޖެ ވަޑައިގެން ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން ރައީސް މުއިއްޒު ވިދާޅުވީ އެމަނިކުފާނާއި އެމަނިކުފާނުގެ ވަފުދުން ތުރުކީގެ ރައީސް އާއި ނައިބު ރައީސް އާއި ރައްޔިތުންގެ މަޖިލިހުގެ ރައީސްގެ އިތުރުން ވަރަށް ގިނަ ވަޒީރުންނާ ބައްދަލުކުރެއްވި ކަމަށެވެ. އެ ބައްދަލުވުންތައް ކުރިއަށް ގެންދިޔައީ ވަކިވަކި ބައްދަލުވުންތަކެއްގެ ގޮތުގައި ކަަމަށް ރައީސް މުއިއްޒު ވިދާޅުވި އެވެ.
ރައީސްގެ ވާހަކަފުޅުގައި، މި ދަތުރުފުޅުގެ ތެރެއިން ދެ ގައުމުގެ މެދުގައި އިގުތިސޯދީ ދާއިރާއިން ވަރަށް މުހިންމު އެއްބަސްވުމެއްގައި ސޮއިކުރެވިފައިވާކަން ފާހަގަ ކުރެއްވި އެވެ. މި އެއްބަސްވުމުގެ ތެރެއިން ވިޔަފާރީގެ މުއާމަލާތްތައް އިތުރުކުރުމުގެ މަސައްކަތް މިހާރު ފެށިފައިވާ ކަމުގައި އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި ފަތުރުވެރިކަން ފަދަ ސިނާއަތްތަކުން ރާއްޖެއަށް އިތުރު އިންވެސްޓްމަންޓްތައް ގެނައުމަށް ތުރުކީވިލާތުގެ ސަރުކާރުން މަސައްކަތް ކޮށްދެއްވާނެކަމުގެ ޔަގީންކަން ލިބިވަޑައިގެންފައިވާ ކަމުގަ އެވެ.
