ހދ. އަތޮޅު ކައުންސިލުގެ ރައީސްކަންވެސް ކުރައްވާފައިވާ ސަގީފް، އެކަން އިއުލާން ކުރައްވާފައި ވަނީ މީސް މީޑިޔާގައި ކުރެއްވި ޕޯސްޓެއްގަ އެވެ. އެ ޕޯސްޓުގައި އޭނާ ވަނީ ވައިކަރަދޫ ދާއިރާގައި ހިމެނޭ ނެއްލައިދޫ، ކުރިނބީ އަދި ވައިކަރަދޫ ރައްޔިތުންގެ ތާއީދާއި ނަސޭހަތާ އަދި މަޝްވަރާއަށް އެދިވަޑައިގެންފަ އެވެ.
މޯލްޑިވްސް މީޑިޔާ ކައުންސިލް (އެމްއެމްސީ) ގެ ނައިބު ރައީސްކަންވެސް ކުރެއްވި ސަގީފް، މަޖިލިސް އިންތިހާބުގައި ވާދަކުރައްވަން ނިންމަވާފައި ވަނީ އަދާލަތު ޕާޓީ (އޭޕީ) ގެ ފަރާތުންނެވެ.
"ތިލަދުންމަތީ ފިކުރު" ގެ ނަމުގައި 2019 ވަނަ އަހަރު ބޭއްވި އިންތިހާބުގައި އެ ދާއިރާއަށް ވާދަކުރައްވާ އޭނާ ވަނީ 995 ވޯޓު ހޯއްދަވާފަ އެވެ. އިންތިހާބުން ލިބިވަޑައިގަތް ނާކާމިޔާބީ އާއެކު ސަގީފް ވަނީ ތިލަދުންމަތީގެ ހަބަރުތަކަށް ހާއްސަކޮށް "ތިލަދުން" ގެ ނަމުގައި ނޫހެއް އުފައްދަވާފަ އެވެ. އެފަހުން އިނގިރޭސި ބަހުން ހަބަރުތައް ގެނެސްދިނުމަށް "ތިލަދުންމަތީ ޓައިމްސް" ފެއްޓެވި އެވެ.
