މަޖިލީހުގެ ތިން ވަނަ ދައުރު ނިމޭ ތާރީހަކީ ނޮވެމްބަރު 27 އެވެ، ނަމަވެސް، އޭރު ވެސް މަސައްކަތްތައް ހުރުމުން، ޑިސެމްބަރު 7 އަށް މުއްދަތު އިތުރު ކުރި އެވެ.
މަޖިލީހުގައި މުހިންމު މަސައްކަތްތަކެއް ހުރުމުން މަޖިލީހުގެ މި ދައުރު މި މަހުގެ ހަތްވަނަ ދުވަހުގެ ނިޔަލަށް ދިގުދަންމާލުމަށް ފާސްކުރީ މިދިޔަ މަހުގެ 27 ވަނަ ދުވަހު ބޭއްވި މަޖިލީހުގެ ޖަލްސާގަ އެވެ.
މިއަދުގެ ޖަލްސާގައި ރިޔާސަތުން މަޖިލިސް ރައީސް އަސްލަމް ވިދާޅުވީ މަސައްކަތްތައް ނިމިފައި ނުވާތީ މަޖިލީހުގެ ދައުރު އަނެއްކާ ވެސް އިތުރު ކުރަން ނިންމާފައިވާ ކަމަށެވެ. ހުށަހެޅުމަށް މިއަދުގެ ޖަލްސާގެ ވޯޓް ގަޑީގައި އަހާނެ އެވެ.
މަޖިލީހަށް މިވަގުތު ހުށަހެޅިފައިވާ އެންމެ މުހިއްމު ދެ މައްސަލަ އަކީ ދައުލަތުގެ އަންނަ އަހަރުގެ ބަޖެޓް ފާސްކުރުމާއި، އާ ސަރުކާރުގެ ވަޒީރުންނަށް ރުހުން ދިނުމުގެ މައްސަލަ އެވެ. އަދި އެޑިޔުކޭޝަން މިނިސްޓަރު ޑރ އިސްމާއިލް ޝަފީއު މަޖިލީހަށް ހާޒިރުކޮށް ސުވާލު ކުރުން ހިމެނެ އެވެ.
