އަދުރޭ މިހެން ވިދާޅުވީ، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީން ކުރިއަށްދާނެ ގޮތަކާބެހޭ ގޮތުން ގޮތް ނިންމަން މިރޭ ބޭއްވި ސެނެޓު ބައްދަލުވުމަށް ފަހު ނޫސްވެރިންނާ ބައްދަލުކުރައްވާ ވާހަކަދައްކަވަމުން ނެވެ.
ޕީޕީއެމް/ޕީއެންސީގެ ލީޑަޝިޕުން އެކަހެރިވެ ވަޑައިގެން އާ ސިޔާސީ ޕާޓީއެއް އުފައްދަން މަސައްކަތްކުރުމަކީ ޕީޕީއެމް/ޕީއެންސީގެ ކުރިމަގަށް ކިހާވަރެއްގެ ގޮންޖެހުމެއްތޯ ސުވާލު ކުރުމުން އަދުރޭ ވިދާޅުވީ، އެ ކޯލިޝަންގެ ލީޑަޝިޕުން އެއްވެސް ބޭފުޅަކު މަދުނުވާ ކަމަށެވެ.
އަދުރޭ ވިދާޅުވީ ކުރިއަށް އޮތް މަޖިލިސް އިންތިހާބަށް ވެސް އެ ޕާޓީން ނިކުންނަނީ ވާދަވެރިން ނުތިބޭނެ ކަމަށް ބަލައިގެން ނޫންކަމަށާއި، ނިކުންނަނީ ވާދަވެރިންވެސް ތިބޭނެ ކަމަށް ބަލައިގެން އެ މީހުންނާ ވާދަ ކުރުމަށް ކަމަށެވެ.
މަޖިލިސް އިންތިހާބަށްފަހު ޕީޕީއެމް/ޕީއެންސީގެ މެމްބަރުން، ޔާމީން އުފައްދަވާ ޕީއެންއެފްއަށް ނުދާނެ ކަމުގެ އޮތީ ކިހާ ބޮޑު ޔަގީންކަމެެއްތޯ ސުވާލު ކުރުމުން ވެސް އަދުރޭ ވިދާޅުވީ، އެއްވެސް މެމްބަރަކު ނުދާނެ ކަމުގެ ޔަގީންކަން އެބައޮތް ކަމަށެވެ.
ޔާމީން ޕީޕީއެމް އިން ވަކިވެވަޑައިގަތީ އެ ޕާޓީން ބާކީކޮށްލާފައިވާ ކަމަށް ބުނެ އެވެ. އެޔަށްފަހު ޕީއެންއެފްގެ ނަމުގަައި އާ ޕާޓީއެއް އުފެއްދުމަށް މެމްބަރުން ހަމަ ކުރުމުގެ މަސައްކަތް ދަނީ ކުރައްވަމުން ނެވެ. އެ މަސައްކަތުގައި ހަރަކާތްތެރިވާ އިސް ބޭފުޅުން ވިދާޅުވާ ގޮތުން ޕީޕީއެމްގެ މެމްބަރުން ވެސް ދަނީ ޔާމީންގެ އާ ޕާޓީއާ ގުޅެން ބޭނުންވާކަން ހާމަކުރަމުން ނެވެ. އަދި ޕީއެންސީގެ ބައެއް މެމްބަރުންވެސް އެ ޕާޓީއާ ގުޅިފައި ވެއެވެ.
