މިރޭ ބޭއްވި ސެނެޓު ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ޗެއަޕާސަން އަބްދުއްރަހީމް އަބްދުﷲ ވިދާޅުވީ، ޕްރައިމަރީގައި ވާދަކުރަން ބޭނުންވާ މީހުންނަށް އެ ފުރުސަތު މާދަމާ ހުޅުވާލާނެ ކަމަށެވެ. 

މާދަމާ އެ ފުރުސަތު ހުޅާވާލާއިރު ޕްރައިމަރީއަށް ކުރިމަތިލެވޭނީ އަދި ވޯޓުލެވޭނީ ވެސް ދެ ޕާޓީގެ މެމްބަރެއްގެ ގޮތުގައި މިމަހުގެ 10އަކާ ހިސާބަށް ތިބޭ މެމްބަރުންނަށް ކަމަށް މިރޭގެ ސެނެޓް ބައްދަލުވުމުގައި ނިންމާފައިވާ ކަމަށް ވެސް އޭނާ ވިދާޅުވި އެވެ.

އެ ކޯލިޝަންގެ މަޖިލިސް ޕްރައިމަރީ މިމަހުގެ 23 އަށް އަވަސް ކުުރިއިރު، މިދިޔަ މަހުގެ އެއްވަނަ ދުވަހު ޕީޕީއެމްއިން ބުނެފައިވާ ގޮތުގައި އެ ޕްރައިމަރީ ބާއްވަން ހަމަޖައްސާފައިވަނީ އަންނަ ޖެނުއަރީ 20 ގައެވެ. 

ޕީޕީއެމް/ޕީއެންސީ އެކީގައި ވާދަކުރަން ނިންމާ އެ ދުވަހު އާންމުކުރި ބަޔާނުގައި ވާގޮތުން މަޖިލީހުގެ އެ ކޯލިޝަންގެ ޓިކެޓަށް ޝައުގުވެރިވެރިވާ މެންބަރުން އެކަމަށް އެދި ހުށަހެޅުމުގެ ފުރުސަތު ހުޅުވާލަން އޭރު ނިންމާފައިވަނީ މި މަހުގެ 20 ވަނަ ދުވަހުން ފެށިގެން 31 ގެ ނިޔަލަށެވެ.

މިހާރު ހިނގަމުންދާ 19 ވަނަ މަޖިލީހުގެ ފަސް އަހަރުގެ ދައުރު ހަމަވާނީ، އަންނަ އަހަރުގެ މޭ މަހުގެ 28 ވަނަ ދުވަހު އެވެ.