ޖޭއެސްސީގައި ގާނޫނީ ވަކީލުންގެ ތެރެއިން އިންތިހާބު ކުރާ މެންބަރުގެ މަގާމު ހުސްވީ، ކުރިން އެ މަގާމުގައި ހުންނެވި އަބްދުލް މާނިއު ހުސައިން އިސްތިއުފާ ދެއްވުމުންނެވެ. މާނިއު ފަހުންވަނީ ހައިކޯޓުގެ ފަނޑިޔާރުކަމަށް ނަގައިފައެވެ.
ޖޭއެސްސީގެ ވަކީލް ސްލޮޓަށް މީހަކު ހޯދަން އިއުލާން ކުރުމުން އެ މަގާމަށް ޝުޖާއު އުސްމާން ކުރިމަތި ލެއްވިއެވެ. އެހެންނަމަވެސް ޝުޖާއު އުސްމާންގެ ޝަރުތު ހަމަނުވާ ކަމަށް ބާ ކައުންސިލުން ނިންމުމުން ޝުޖާއު އެ މައްސަލަ ސިވިލް ކޯޓަށް ހުށަހެޅިއެވެ.
ޝުޖާއުގެ ފަރާތުން ސިވިލް ކޯޓަށް މިދިޔަ ހޯމަ ދުވަހު ހުށަހެޅި މައްސަލާގައި އެދިފައި ވަނީ އެ އިންތިހާބުގައި ވާދަކުރުމުގެ ޝަރުތު ފުރިހަމަވާ ކަމަށް ކަނޑައަޅާ ދިނުމަށާއި އެ މަގާމަށް ކުރިމަތިލުމުގެ ފުރުސަތު އަލުން ހުޅުވާލުމަށް ބާ ކައުންސިލަށް އެނގުމަށެވެ.
އެހެންނަމަވެސް ސިވިލް ކޯޓުން މިއަދު އިއްވި ހުކުމުގައި ބުނީ ބާ ކައުންސިލްގެ ނިންމުން ބާތިލް ކަމަށް ކަނޑައަޅައި ދީ ބާ ކައުންސިލްގެ އިންތިހާބުގައި ވާދަކުރުމުގެ ފުރުސަތު ދިނުމުގެ އަމުރަކަށް ޝުޖާއުގެ ފަރާތުން އެ މައްސަލާގައި އެދިފައިވީ ނަމަވެސް އެ އަމުރު ނެރެދެވެން ނެތް ކަމަށެވެ.
ޝުޖާއު ހައިކޯޓުގެ ފަނޑިޔާރު ކަމުން އޮގަސްޓު 2020ގައި އިސްތިއުފާ ދެއްވީ އޭނާ އެމަގާމުން ވަކިކުރުމަށް ޖޭއެސްސީން ނިންމާފައިވަނިކޮށެވެ. ޖޭއެސްސީން އެގޮތަށް ނިންމީ 2018ގެ ރިޔާސީ އިންތިހާބުގައި އޭރުގެ ރައީސް އަބްދުﷲ ޔާމީނަށް ވޯޓު ހޯދުމަށް މަގާމުގެ ބޭނުން ނަހަމަ ގޮތުގައި ކުރި މައްސަލައެއްގެ ތުހުމަށެވެ.
