ބަންޑާރަކޮށީގައި ބޭއްވި ހާއްސަ ރަސްމިއްޔާތުގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ރައީސް މުއިއްޒު، އަބްދުއްރަހީމަށް ލެފްޓިނެންޓް ޖެނެރަލްގެ ރޭންކު ހަވާލުކޮށްދެއްވިއިރު، މަގާމުގެ ކުރިއެރުން ދެއްވިކަމުގެ ލިޔުން ހަވާލުކޮށްދެއްވާފައި ވަނީ ޑިފެންސް މިނިސްޓަރު މުހައްމަދު ގައްސާން މައުމޫނެވެ.
މިއީ މި އަހަރުގެ ތެރޭގައި އަބްދުއްރަހީމަށް ޕްރޮމޯޝަން ލިބިވަޑައިގެންނެވި ދެ ވަނަ ފަހަރެވެ. ކުރީގެ ރައީސް އިބްރާހިމް މުހައްމަދު ސޯލިހުގެ އެޑްމިނިސްޓްރޭޝަނުގައި މޭޖާ ޖެނެރަލެއްގެ ރޭންކަށް އޭނާ ޕްރޮމޯޓުކޮށްފައި ވަނީ މިދިޔަ ޖުލައި މަހުގެ 25 ވަނަ ދުވަހު އެވެ. މިދިޔަ މަހުގެ 17 ވަނަ ދުވަހު ވެރިކަމުގެ ހުވާކުރެއްވުމަށް ފަހު ރައީސް މުއިއްޒު ވަނީ އަބްދުއްރަހީމަށް ޗީފް އޮފް ޑިފެންސް ފޯސްގެ މަގާމު ދެއްވާފަ އެވެ.
ޗީފް އޮފް ޑިފެންސް ފޯސް އަބްދުއްރަހީމަށް ޕްރޮމޯޝަން ދިނުމަށް ބޭއްވި ރަސްމިއްޔާތުގައި ސިފައިންގެ އެންމެ މަތީވެރިޔާ ރައީސް މުއިއްޒާއި ޑިފެންސް މިނިސްޓަރު ގައްސާން - ފޮޓޯ:އެމްއެންޑީއެފް
ލެފްޓިނެންޓް ޖެނެރަލް އަބްދުއްރަހީމަކީ ދިވެހި އަސްކަރިއްޔާގެ ތާރީހުގައި ލެފްޓިނެންޓް ޖެނެރަލްގެ ރޭންކާ ހަމައަަށް ވަޑައިގެންނެވި ތިން ވަނަ އޮފިސަރެވެ. މީގެ ކުރިން އެ ރޭންކް ލިބިވަޑައިގަތް ދެ ބޭފުޅުންނަކީ ލެފްޓިނެންޓް ޖެނެރަލް (ރިޓަޔާޑް) އަންބަރީ އަބްދުއްސައްތާރާއި ލެފްޓިނެންޓް ޖެނެރަލް (ރިޓަޔާޑް) އަބްދުﷲ ޝަމާލް އެވެ.
ލެފްޓިނެންޓް ޖެނެރަލަކީ ސިފައިން ރޭންކްތަކުގެ ތެރެއިން ދެވަނައަށް އެންމެ އިސް ރޭންކް ކަމަށްވާއިރު، އެންމެ އިސް ރޭންކަކީ ޖެނެރަލް އެވެ.
