ރައްޔިތުންގެ މަޖިލިހުގެ މިއަދުގެ ޖަލްސާގައި ހޯރަފުށި ދާއިރާގެ މެމްބަރު އަހުމަދު ސަލީމް ކުރެއްވި ސުވާލަށް ޖަވާބުދެއްވަމުން ސައީދު ވިދާޅުވީ ބަންކަރިން ހިދުމަތް ދޭން އެއްބަސްވެފައި ވަނީ ގަތަރުގެ ކުންފުންޏަކާއި އެސްޓީއޯ އާ ދެމެދުގައި ކަމަށެވެ. އެ އެއްބަސްވުން އަދި ކުރިއަށް ދާ ކަމުގައި ސައީދު ވިދާޅުވި އެވެ.
ރާއްޖޭގެ އެންމެ އުތުރު، އިހަވަންދިއްޕޮޅުގައި ތެލުގެ ސްޓޯރޭޖެއް ހަދައި ތެޔޮ ބަންކަރިން ހިދުމަތް ދިނުމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ގަތަރުގެ އާބަކޮން ޓްރޭޑިން އެންޑް ކޮންޓްރެކްޓިން (ޔޫސީސީ) އާއެކު އެއްބަސްވުމެއްގައި ސޮއިކޮށްފައި ވަނީ މިދިޔަ އޮގަސްޓު މަހުގެ 11 ވަނަ ދުވަހު އެވެ.
އެސްޓީއޯއިން އޭރު ބުނެފައި ވަނީ އިހަވަންދިއްޕޮޅުގައި ތަރައްގީކުރުމަށް ރޭވިފައިވާ ޕޯޓް ސިޓީގެ އެންމެ މުހިންމު އެއް ބަޔަކީ ތެލުގެ ގައުމީ ސްޓްރެޓެޖިކް ރިޒާވްއެއް ހެދުމާއި އިންޓަނޭޝަނަލް ބަންކަރިންގެ ހިދުމަތް ފެށުން ކަމަށެވެ. އެގޮތުން ސޮއި ކުރެވުނު އެމްއޯޔޫއަކީ އެ ކުންފުންޏާއި އާބަކޮން ގުޅިގެން ބަންކަރިން އަދި ގައުމީ ތެލުގެ ރިޒާވް ތަރައްގީ ކުރުމަށް ބޭނުންވާ ފީސިބިލިޓީ ސްޓްޑީޒްތައް ހަދައި މި ޕްރޮޖެކްޓް ކުރިއަށް ގެންދިއުމަށްޓަކައި ވެވުނު އެއްބަސްވުމެއް ކަމަށް އެސްޓީއޯއިން ބުނެފައިވެ އެވެ.
ސައީދު ވިދާޅުވި ގޮތުގައި، އެ މަޝްރޫއު ކުރިއަށް ގެންދާނެ ގޮތެއް ބެލުމަށް އެއްބަސްވުން ރިވިއު ކުރަމުގެ މަސައްކަތް ކުރަމުން އަންނަ ކަމުގަ އެވެ. އެ އެއްބަސްވުމަކީ ބަންކަރިން ހިދުމަތް ދިނުމަށް އެކަން ކުރެވިދާނެތޯ ބެލުމުގެ އެއްބަސްވުމެއް ކަމަށް އޭނާ ވިދާޅުވި އެވެ.
ރާއްޖެ އޮންނަ ސަރަހައްދުގެ ގޮތުން އިހަވަންދިއްޕޮޅު ކައިރިން ދުވާލަކު 300 އަށް ވުރެ ގިނަ އާގުބޯޓު ދަތުރުކުރި ނަމަވެސް އެ ބޯޓުފަހަރަށް ހިދުމަތްތައް ދެވޭނެ ގޮތްތަކެއް އެ ސރަހައްދުގައި ގާއިމުކުރެވިފައެއް ނުވެ އެވެ. އެހެންކަމުން އެ ސަރަހައްދުގައި ބަންކަރިން ހިދުމަތްތަކާއި ބޯޓުފަހަރަށް ބޭނުންވާ އިތުުރު ހިދުމަތްތައް ދިނުމަކީ މި އެޑްމިނިސްޓްރޭޝަނުގެ ވިސްނުމެއް ކަމަށް ސައީދު ވިދާޅުވި އެވެ.
