އެޑިޓާސް ގިލްޑުން މިއަދު ނެރުނު ނޫސްބަޔާނެއްގައި ބުނީ ރާއްޖޭގައި މިނިވަންކަމާ އެކު ފިކުރު ކުރުމާއި އިސްލާމްދީނުގެ އަސްލަކާ ހިލާފު ނުވާ ގޮތުގެ މަތީން ދުލާއި ގަލަމުން ހިޔާލުފާޅުކުރުމުގެ މިނިވަންކަމަކީ ގާނޫނު އަސާސީގެ 27 ވަނަ މާއްދާއިން ދިވެހި ރައްޔިތުންނަށް ކަށަވަރު ކޮށްދީފައިވާ އަސާސީ ހައްގެއް ކަމަށެވެ.
އެޑިޓާސް ގިލްޑުން ބުނެފައި ވަނީ މޯލްޑިވްސް މީޑިއާ ކައުންސިލުގެ ގާނޫނުން "މީޑިއާ" ކަމަށް ބަލައިގެންފައިވާ ހަމަތަކުގެ ތެރޭގައި ވެސް ރަޖިސްޓްރީ ނުކޮށް ހިންގާ ނޫސް މަޖައްލާތަކަކީވެސް ހަބަރާއި މައުލޫމާތު ފެތުރުމަށް މީޑިއާ ކަމަށް ބަލައިގެންފައިވާ ކަމަށެވެ.
މީޑިއާ ކައުންސިލުގެ ދައުރެއް ނެތި އެ ދެ ވެބްސައިޓް ބަންދުކުރަން ޖެހުނު ސަބަބު ހާމަކުރުމަށާއި ހާމަނުކުރާހާ ހިނދަކު އެ ދެ ސައިޓް އަލުން އޮޕަރޭޓް ކުރުމަށް ދޫކޮށްލުމަށްވެސް އެ ޖަމިއްޔާގެ ބަޔާނުގައި ވަނީ ގޮވާލާފަ އެވެ.
އެޑިޓާސް ގިލްޑުން ބުނި ގޮތުގައި ތެދު މައުލޫމާތު ފެތުރުމަށް ބާރުދިނުމުގެ ގޮތުން ދައުލަތުގެ އިދާރާތަކުން މީޑިއާތަކަށް އަދި ފަރުދުންނަށް ވިޔަސް، މައުލޫމާތު ފޯރުކޮށްދިނުމަށް ހުރަސްއަޅައިގެންވެސް ނުވާނެ ކަމުގަ އެވެ. އެ ދޮރަކީ ތައްމިނަށް ހުޅުވާލެވިފައި އޮންނަ ދޮރަކަށް ވާން ޖެހޭނެ ކަމަށާއި އެހެން ނޫނީ ތެދު މައުލޫމާތު، ތެދަށް ފޯރުކޮށްދޭ ފަރާތްތަކަށް އެކަން ރަނގަޅު ގޮތުގައި ނުކުރެވޭނެ ކަމަށް އެ ޖަމިއްޔާގެ ބަޔާން ނިންމާލަމުން އެޑިޓާސް ގިލްޑުން ވަނީ ފާހަގަކޮށްފަ އެވެ.