ކުރީގެ މިނިސްޓްރީ އޮފް ޔޫތު އެން ސްޕޯޓްސް، ދެ މިނިސްޓްރީއަކަށް ބަދަލުވުމާ ގުޅިގެން، އޮފީސް ބަދަލުވުމުގެ މަސައްކަތުގެ ތެރެއިން ހަ މޮނީޓަރަކާއި، ދެ ސީޕީޔޫއެއްގެ އިތުރުން 65 އިންޗީގެ ޓީވީއެއް ގެއްލިފައިވާ ކަމަށް އެ މިނިސްޓްރީން ބުނެއެވެ.
އެ މައްސަލައާއި ގުޅިގެން ޔޫތު މިނިސްޓްރީން ނެރުނު ބަޔާނުގައި ބުނީ ތަކެތި ބަދަލު ކުރުމުގެ އެއްވެސް މަރުހަލާއެއްގައި މިނިސްޓްރީގެ ސިޔާސީ މުވައްޒަފުން ބައިވެރިވެފައިނުވާނެކަމަށެވެ.
އެ ކަންކަމާއި ހަވާލުވެ ހުންނެވި އެ މިނިސްޓްރީއެއްގެ ހުންނެވި ޒިންމާދާރު އިސްވެރިޔާގެ ބެލުމުގެ ދަށުންކަމަށް މިނިސްޓްރީގެ ބަޔާނުގައި ބުނެއެވެ.
ގެއްލިފައިވަނީ ސްޕޯޓްސް މިނިސްޓްރީގެ ތަކެއްޗަށްވާއިރު، ޔޫތު މިނިސްޓްރީން ބުނީ އެކަންތައް އެ މިނިސްޓްރީގެ ސަމާލުކަމަށް އައުމާއެކު ކަން ހިނގި ގޮތް ބެލުމަށް އިންޓާނަލް އިންވެސްޓިގޭޝަނެއް ފަށާފަވާކަމަށެވެ.
އެ މައްސަލަ މިނިސްޓްރީން ވަނީ ފުލުހަށް ވެސް ހުށަހަޅާފަ އެވެ.
