ޔުނާން ދޫކޮށްލީ ހުޅުމާލޭ މެޖިސްޓްރޭޓް ކޯޓުންނެވެ. މައުލޫމާތު ލިބިފައިވާ ގޮތުގައި ޔުނާން ދޫކޮށްލީ ޝަތުރު ކުރުމަށް ފަހު އެވެ. އެހެންނަމަވެސް އެ ޝަރުތުތަކުގެ ތަފްސީލެއް ލިބިފައެއް ނުވެ އެވެ. އެ މައްސަލަ ހައިކޯޓުގައި އިސްތިއުނާފު ކުރީ ދައުލަތުންނެވެ. ބުދަ ދުވަހު ހައިކޯޓުގައި އެ މައްސަލަ ބައްލަވާނީ ތިން ފަނޑިޔާރުންގެ މައްޗަށް އެކުލެވޭ ބެންޗަކުންނެވެ. ހައިކޯޓުގެ ތާވަލު ދައްކާ ގޮތުން އެ މައްސަލަ ބުދަ ދުވަހު ހެނދުނު ފަށާނެއެވެ.
ޔުނާން ދޫކޮށްލާފައިވާއިރު، ޔުނާން އާއެކު އެ މައްސަލަތަކުގައި ހިމެނޭ އޭނާގެ އަންހެނުން، ފާތިމަތު ރިހުލާވެސް ކުރިން ބަންދުން ދޫކޮށްލާފަ އެވެ. ރިހުލާ ބަންދުން ދޫކޮށްލާފައި ވަނީ، ބަލިވެ އިނުމާ ގުޅިގެން މިދިޔަ މާޗު މަސް ތެރޭގަ އެވެ.
އުމުރުން 15 އަހަރުގެ ފިރިހެން ކުއްޖަކާ އެކު ގަދަކަމުން ބަދުއަހުލާގީ އަމަލު ހިންގި ކަމަށް ތުހުމަތުކުރެވޭ މައްސަލައެއްގައި ޔުނާންގެ ދެމަފިރިން ހައްޔަރު ކުރީ 2020 ވަނަ އަހަރުގެ ތެރޭގަ އެވެ.
ޔުނާން އާ އޭނާގެ އަންހެނުންގެ މައްޗަށް، ދުވަސްމަތިން އުމުރުން 18 އަހަރު ނުފުރޭ ކުޑަކުދިންތަކަކަށް ޖިންސީ ގޯނާކުރިކަމުގެ ތުހުމަތުގައި ބައިވަރު ދައުވާތައް އުފުލާފައިވެ އެވެ.
