ދައުލަތުގެ މީޑިއާ މެދުވެރިކޮށް ބުދަ ދުވަހުގެ ރޭ ވާހަކަ ދައްކަވަމުން މިނިސްޓަރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެންމެ އިސްކަމެއް ދެއްވާ އެއް އެޖެންޑާއަކީ ރައްޔިތުންގެ ރައްކާތެރިކަން ކަމަށެވެ.
މިނިސްޓަރު ވިދާޅުވީ ރައީސް މުއިއްޒު ވެރިކަމަށް ކުރިމަތިލެއްވީވެސް، ސިއްހީ ދާއިރާގެ ވަރަށް ގިނަ ދިރާސާތަކާ އެއްކޮށްކަމަށެވެ.
ހެލްތު މިނިސްޓަރު ވިދާޅުވީ ސިއްހީ ދާއިރާގެ އެންމެ ބޮޑު އަމާޒަކަށް މި ފަސް އަހަރު ވާނީ ވެސް ސިއްހީ ގޮތުން ރައްކާތެރިކަމުގެ ނިޒާމު ހަރުދަނާކޮށް ވަރުގަދަކުރުންކަމަށެވެ.
މިނިސްޓަރު ވަނީ ރާއްޖެއިން ފައިލޭރިއާ ފެނުމާއި ގުޅިގެން ކުރަމުން ގެންދާ މަސައްކަތްތަކާ ގުޅޭގޮތުން ވެސް ވާހަކަ ދައްކަވާފައެވެ. އެގޮތުން މިނިސްޓަރު ވަނީ ދިވެހިރާއްޖޭގައި ފައިލޭރިއާ ކޭސްްތައް އިތުރުވެދާނެތީ ރައްޔިތުން ކަންބޮޑުވުން ނުވުމަށް އެދިލައްވާފައެވެ. އަދި ފައިލޭރިއާ ޓެސްޓު ކިޓާއި ބޭހުގެ ސްޓޮކް ވެސް ހުއްވިޔަ ނުދީ ޑަބްލިއުއެޗްއޯގެ ލަފައާއި އެހީތެރިކަމިގެ މަތިން ބަލަހައްޓަމުން އަންނަކަމަށް ވެސް މިނިސްޓަރު ވިދާޅުވިއެވެ.