މާލޭ މޭޔަރުކަމަށް ވާދަކުރައްވާ ސަރުކާރު ކެނޑިޑޭޓު އާޒިމާ ޝަކޫރުގެ ކެމްޕޭނު ހަރަކާތެއްގައި މާލޭގައި ހޮނިހިރު ދުވަހު ވާހަކަދައްކަވަމުން ރައީސް މުއިއްޒު ވިދާޅުވީ މާލޭ ސަރަހައްދުން ހިއްކާ ހަތަރު ބިމުގައި ގެދޮރު އަޅައި ވަރަށް އަވަހަށް އާބާދުވާން ފެށޭނެކަމަށެވެ. އެގޮތުން ސަރުކާރުގެ ކުންފުނިތައް މެދުވެރިކޮށް ލުއިލޯނު ހަމަޖެއްސުމުގެ މަސައްކަތް މިހާރު ފަށާފައިވާކަމަށް ވެސް މުއިއްޒު ވިދާޅުވިއެވެ.
މާލެ ސަރަހައްދުގައި އަލަށް ހިއްކަން ފަށާފައިވާ ބިންތަކަކީ ގުޅީފަޅު، ހުޅުމާލެ ފޭސް ތިނެއް، ގިރާވަރު ފާޅު އަދި ރަސްމާލެއެވެ.
ރައީސް މީގެ ކުރިން ވިދާޅުވެފައިވާގޮތުން، މާލެ ސަރަހައްދުގެ ބިންތައް 8 މަސް ދުވަހުގެ ތެރޭގައި ހިއްކާއި ނިންމާލުމަކީ ސަރުކާރުގެ އަމާޒެކެވެ.
ގުޅީފަޅާ، ހުޅުމާލެ ފޭސް 3 ހިއްކަން ފެށީ މި ނުމުނު އެމްޑީޕީ ސަރުކާރުގައެވެ. ނަމަވެސް ސަރުކާގެ މުއްދަތު ހަމަވިއިރު ވެސް އެ މަޝްރޫތަކެއް ނިންމައެއް ނުލެވުނެވެ. އެހެންކަމުން ރައީސް ޑރ، މުއިއްޒު ވެރިކަމާ ހަވާލުވެ ވަޑައިގަތުމަށްފަހު ވަނީ އެ ތިން ބިން ވެސް ހިއްކުމުގެ މަސައްކަތް އަލުން ފައްޓަވާފައެވެ.
މި ސަރުކާރުން ވަނީ ފުށިދިއްގަރު ފަޅުގައި "ރަސްމާލެ" ނަމުގައި އާ ބިމެއް ހިއްކުމުގެ މަޝްރޫއެއް ފަށާފައެވެ. ފުށިދިއްގަރުފަޅު ހިއްކައިގެން "ރަސްމާލެ" ތަރައްގީ ކުރުމުގެ މަޝްރޫއަށް، އެ ފަޅު ހިއްކުމުގެ މަސައްކަތް ކުރަމުންއަންނަ ލަންކާގެ ސީއެމްސީސީން 10.7 ބިލިއަނަށް ވުރެ ގިނަ ރުފިޔާ ހަރަދު ކުރާނެކަމަށް ސަރުކާރުން ވަނީ މީގެ ކުރިން ބުނެފައެވެ. ޑޮލަރުން ބަލާނަމަ އެއީ 700 މިލިއަން ޑޮލަރުގެ އަގުބޮޑު މަޝްރޫއެކެވެ.
