މާލޭގެ ތަރައްގީ އަށް ހުރަސްއަޅާނެ މީހަކު މާލޭގެ މޭޔަރު ކަމަށް ގެނައުމަކީ ރަނގަޅު ކަމެއް ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
Advertisement
ރައީސް. ޑރ. މުއިއްޒު މިހެން ވިދާޅުވީ، މާދަމާ އަކީ މާލޭގެ މޭޔަރަކު ހޮވުމަށް ބާއްވާ ބައި އިލެކްޝަން އޮންނަ ދުވަހަށް ވާތީ، އެކަމާއި ގުޅުވައިގެން މިއަދު ދެއްވި ވީޑިއޯ މެސެޖެއްގަ އެވެ.
ރައީސް ވިދާޅުވީ މާލޭގެ ރައްޔިތުންނަށް ދިމާވެފައިހުރި ބޮޑެތި މައްސަލަތަކަށް ހައްލު ގެނެސްދިނުމަށް ޓަަކައި ސަރުކާރުން ބޮޑެތި ގިނަ މަސައްކަތްތަކެއްް މިހާރު ފަށައިފައިވާ ކަމަށެވެ.
"އަޅުގަނޑު ތިޔަ ލޮބުވެތި ރައްޔިތުންގެ އިތުބާރާ ތާއިދާއެކީގައި ކުރީގައިހުރި މާލޭގެ މޭޔަރުކަމުގެ މަގާމުގައި ފަށަން މަސައްކަތްކޮށް ނުފެށުނު އެތައް މަސައްކަތްތަކެއް، އޭރުގައި އެއްބާރުލުން ނުލިބުނު، ސަރުކާރު ލެވަލުން ނުލިބުނު އެތައް ކަމެއް އިރާދަކުރެއްވިއްޔާ މިހާރު އަޅުގަނޑު މި ވަނީ މަސައްކަތްކުރުމަށް ކައުންސިލަށް ފުރުސަތު ދީފަައި،" ރައީސް ވިދާޅުވި އެވެ.
ރައީސް ވިދާޅުވީ މާދަމާ ވޯޓުލާއިރު މިފަދަ ކަންކަމާ މެދު މާލޭގެ ރައްޔިތުން ވިސްނަންޖެހޭ ކަމަށާއި ސަރުކާރާއި މާލޭގެ ރައްޔިތުންނާ ދޭތެރޭގައި ހުރަހަކަށްވާނެ މީހަކު މޭޔަރަކަށް އިހުތިޔާރު ކުރުމަކީ ފައިދާވާނެ ކަމެއް ނޫން ކަމަށެވެ.
"އަޅުގަނޑު މިހިރީ މާލޭގެ ރައްޔިތުންނަށް ބޭނުންވެފައި މިހިރަ ހުރިހާ ކަމެއް ކުރަން ތައްޔާރަށް ކަމުގައިވާއިރު، މި ކަންކަމަށް ހުރަސްއަޅާނެ މީހަކު މާލޭގެ މޭޔަރަކަށް މިވަގުތު ހިޔާރުކުރުމަކީ އެއްގޮތަކަށް ވެސް ރަނގަޅު ކަމަކަށް ނުވާނެ،" ރައީސް ވިދާޅުވި އެވެ.
ރައީސް ޑރ. މުއިއްޒުގެ މެސެޖު ނިންމަވާ ލައްވާފައި ވަނީ ރާއްޖޭގެ ރައްޔިތުން އެ މަނިކުފާނަށް ކުރެއްވި އިތުބާރަށް ޓަކައި ޝުކުރު އަދާކުރައްވައި، އެއްވެސް ރައްޔިތަކު ތަފާތުކުރުމެއް ނެތި، ހުރިހާ ރައްޔިތުންނަށް ހިދުމަތްކުރެއްވުންމަތީ ދެމިހުންނަވާނެ ކަމުގެ ޔަގީންކަން ދެއްވަމުންނެވެ.
މާލޭގެ މޭޔަރު ކަމަށް ވާދަކުރައްވަނީ އެމްޑީޕީގެ ފަރާތުން އާދަމް އާޒިމް އާއި ޕީޕީއެމް ޕީއެންސީގެ ޓިކެޓުގައި އާޒިމާ ޝުކޫރު، ކުރީގެ ކޮމިޝަނަރ އޮފް ޕޮލިސް ހުސައިން ވަހީދު އަދި ޑިމޮކްރެޓްސްގެ ޓިކެޓުގައި މުހައްމަދު ސައިފް ފާތިހުގެ އިތުރުން އަމިއްލަ ގޮތުން ވާދަކުރައްވާ ޝުއައިބު އަލީ (ފުރަހަނި ޝުއައިބު) އެވެ
