އިއްޔެ ސަރުކާރުގެ ގެޒެޓުގައި ސާއިރު ކުރި މި ގަވާއިދުގައި ވާ ގޮތުން މިއީ ހާއްސަ އެހީއަށް ބޭނުންވާ މީހުންނަށް، އެހެން މީހުންނެކޭ އެއްފަދައިން ވަޒީފާ އަދާކުރުމުގެ ފުރުސަތުތަކާއި ވަޒީފާގެ މައިދާނުގައި ހަމަހަމަ ފުރުސަތުތައް ލިބިދިނުމުގެ ހައްގު ލިއްބައިދިނުމަށް ޓަކައި އެކަމަށް މަގުފަހިކުރުމަށްޓަކާއި އެކުލަވާލި ގަވާއިދެއްކަމަށާއި މި ހައްގު ކަށަވަރުކޮށްދިނުމަށް އުސޫލުތައް ކަނޑައެޅުމުގެ ގޮތުން ހާއްސަ އެހީއަށް ބޭނުންވާ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނުގެ ދަށުން ބާރު ލިބިގެން އެކުލަވައިލައިފައިވާ ގަވާއިދެއްކަމަށެވެ.
މި ގަވާއިދުގެ މަގުސަދަކީ ނުކުޅެދުންތެރިކަން ހުންނަ މީހުންނައް އެހެން މީހުންނެކޭ އެއްފަދައިން އަމިއްލައަށް އިހްތިޔާރު ކުރާ ވަޒީފާއެއް އަދާކުރުމަށް އަދި ހަމަ ހަމަ ފުރުސަތު ހޯދައިދިނުމާއި، ވަޒީފާގެ މާހައުލުގައި ނުކުޅެދުންތެރިކަން ހުންނަ ފަރާތްތަކަށް އެހެން މީހުންނާއި ތަފާތުކަމެއް ގެންގުޅޭ ގެންގުޅުން ހުއްޓުމަކަށް ގެނެއުމަށާއި ހާއްސަ އެހީއަށް ބޭނުންވާ މީހަކަށް ވަޒީފާދޭ ފަރާތުން، އެ ފަރާތަށް މަސައްކަތްކުރާނެ އެކަށީގެންވާ މާހައުލެއް ގާއިމުކޮށްދީ، މަސައްކަތުގެ މާހައުލުގައި މި ފަރާތްތައް ޝާމިލުކުރާނެ ގޮތްތަކުގެ އުސޫލުތައް ކަނޑައެޅުންކަމަށް މި ގަވާއިދުގައިވެ އެވެ.
މި ގަވާއިދުގައިވާ ގޮތުން ފަރާތުން ވަޒީފާ ހަމަޖައްސައިދިނުމުގެ ކުރިން، އެ ތަނަކީ ވަޒީފާ ދިނުމަށް ތައްޔާރުވެފައިވާ ތަނެއްކަމަށް ހަދަންވާނެއެވެ. އެގޮތުން އެ ފަރާތްތަކަށް ބޭނުންވާ ސަބަބުވެރި ބަދަލުތައް ހަމަޖައްސައިދެވޭ، އެ ތަނެއްގެ މުވައްޒަފުންނަކީ ހާއްސަ އެހީއަށް ބޭނުންވާ މީހުންނާ އެކުގައި މަސައްކަތްކުރުމަށް ބޭނުންވާ ތަމްރީނު ފުރިހަމަކޮށްފައިވާ އިދާރާއަކަށްވާން ޖެހެ އެވެ. އަދި ގަވާއިދަށް އަމަލުކުރަން ފަށާތާ ތިން މަސްދުވަހުގެ ތެރޭގައި ވަޒީފާ ދޭ ފަރާތުން މި މިންގަނޑު އެކުލަވައިލައި އާންމުކުރަން ޖެހެ އެވެ.
މިގަވައިދަށް އަމަލުކުރަން ފަށާނީ މި ގަވައިދު ގެޒެޓު ކުރާތާ އެއް މަސްފަހުން ކަމަށް އެ އިއުލާނުގައިވެ އެވެ.
